హుస్నాబాద్, వెలుగు: దేశంలో రాష్ట్రాన్ని కేసీఆర్ నంబర్వన్గా నిలిపి, అద్భుత విజయాలు సాధించారని మంత్రి హరీశ్రావు అన్నారు. ఇప్పుడు ఆ అద్భుతాలకు, కాంగ్రెస్ అబద్ధాలకు నడుమ ఎన్నికల్లో పోటీ వచ్చిందని, ప్రజలు ఆలోచించాలని ఆయన సూచించారు. తెలంగాణపై బీజేపీకి బరువు లేదని, కాంగ్రెస్కు బాధ్యత లేదని విమర్శించారు. బుధవారం సిద్దిపేట జిల్లా హుస్నాబాద్లో ఇంటిగ్రేటెడ్ ఆఫీస్ కాంప్లెక్స్(ఐవోసీ)ను మంత్రి హరీశ్రావు ఓపెన్ చేశారు.
అనంతరం అందులోని మీటింగ్ హాల్లో మీడియా తో, ఎన్నికల సన్నాహక సమావేశంలో మాట్లాడారు. ఎన్నికలు రాగానే టెంట్లు వేసి స్టంట్లు చేసేది కాంగ్రెస్ పార్టీ అని విమర్శించారు. ‘‘గడ్డుకాలంలో తెలంగాణ పాలన పగ్గాలందుకున్న కేసీఆర్.. రాష్ట్రాన్ని నంబర్వన్గా నిలిపి, అద్భుత విజయాలు సాధించారు. ప్రజలు అద్భుతాలకు ఓటు వేస్తరా? కాంగ్రెస్ అబద్ధాలను నమ్ముతరా? చెప్పాలి” అని అన్నారు. తెలంగాణలో డెవలప్మెంట్ను చూసి ఓర్వలేక కాంగ్రెస్ నాయకులు సీఎం కేసీఆర్ను తిడితే, కేసీఆర్ మాత్రం ప్రజలకు మందులు, పోషకాహార కిట్లు ఇస్తున్నారని చెప్పారు. బీజేపీ, కాంగ్రెస్ పార్టీలోళ్లు కాళ్లల్ల కట్టెవెట్టినా తాము గౌరవెల్లి ప్రాజెక్టును కట్టి తీరినమని తెలిపారు. కొద్దిరోజుల్లోనే సీఎం కేసీఆర్ ప్రాజెక్టు కట్క వొత్తి పంటలకు నీళ్లు విడుదల చేస్తారన్నారు. తొమ్మిదేండ్లలో హుస్నాబాద్ నియోజకవర్గంలో రూ.7,752 కోట్ల పనులు చేసినట్టు వివరించారు.
ALSO READ: రేపే(సెప్టెంబర్ 15న) టెట్.. నిమిషం ఆలస్యమైతే నో ఎంట్రీ
ఈ నెల 16న సీఎం కేసీఆర్ పాలమూరు ఎత్తిపోతల పథకాన్ని ప్రారంభిస్తారని, దీనిని చూసి ప్రతిపక్షాలు ఆగమవుతున్నాయన్నారు. కాంగ్రెస్ డిక్లరేషన్లను చూసి ప్రజలు నవ్వుకుంటున్నారని విమర్శించారు. ‘‘2009లో కాంగ్రెస్ మేనిఫెస్టోలో పెట్టిన ఏ ఒక్క అంశాన్ని కూడా అమలు చేయలేదు” అని ఆరోపించారు. అబద్ధాల కాంగ్రెస్కు అభివృద్ధిలో అద్భుతాలు చేసిన బీఆర్ఎస్కు మధ్య పోటీ ఉందన్నారు. రాష్ట్రంలో బీజేపీ బిచానా ఎత్తేసిందని, ఆ పార్టీ జమిలీ ఎన్నికలను నమ్ముకుంటే తాము ప్రజలను నమ్ముకున్నామని అన్నారు.
దేశంలో కేసీఆర్ను మించిన హిందువు ఉన్నరా?
‘‘సీఎం కేసీఆర్ నిఖార్సయిన హిందువు. దేశంలో ఆయనను మించిన హిందువు ఎవరూ లేరు” అని హరీశ్ తెలిపారు. హుస్నాబాద్ మండలం పొట్లపల్లిలో రూ. 40 లక్షలతో రామాలయ పునరుద్ధరణ పనులకు ఆయన శంకుస్థాపన చేసి, మాట్లాడారు. అందరూ హిందువు అని ప్రదర్శనలకే పరిమితమైతే కేసీఆర్ ఆచరణలో అసలైన హిందువు అని నిరూపించుకున్నారని తెలిపారు. సీఎం కేసీఆర్కు దైవభక్తి ఉంది కనుకనే రాష్ట్రం సుభిక్షంగా ఉంటున్నదని అన్నారు. పొట్లపల్లిలోని -శివాలయ గాలి గోపురం నిర్మాణానికి రూ.50 లక్షలు మంజూరు చేస్తున్నట్టు మంత్రి ప్రకటించారు.
