పెద్దపల్లి, వెలుగు : ఇప్పటికే చేసిన పనులకు బిల్లులు రాక ఇబ్బంది పడుతుంటే మళ్లీ రూ. 10 లక్షల పనులు చేస్తే ఎప్పటికి వస్తాయోనని పెద్దపల్లి జిల్లాలోని ఆయా గ్రామాల సర్పంచులు ఆందోళన చెందుతున్నారు. గతేడాది ఆగస్టులో పెద్దపల్లి కలెక్టరేట్ ప్రారంభానికి వచ్చిన సీఎం కేసీఆర్ జిల్లాలోని 265 గ్రామ పంచాయతీలకు ఒక్కో దానికి స్పెషల్ డెవలప్మెంట్ఫండ్(ఎస్డీఎఫ్) రూ.10 లక్షల చొప్పున తక్షణమే విడుదల చేస్తామని హామీ ఇచ్చారు. దీంతో సర్పంచుల ఆనందానికి అవధుల్లేకుండా పోయాయి. పంచాయతీలకు వచ్చే పైసల్ని ఎలా ఉపయోగించాలో ప్రపోజల్స్ రెడీ చేసుకున్నారు. కానీ ఏడాది గడిచినా ఇప్పటికీ ఒక్క రూపాయి ఇవ్వలేదు. కాగా గత నెల 28న జిల్లా కలెక్టర్ సీఎం ప్రకటించిన ఫండ్కు సంబంధించిన పనులు ఎలా చేయాలో ప్రొసీడింగ్స్ ఆయా సర్పంచులకు ఇచ్చారు. దీనిపై సర్పంచులు తీవ్ర అసహనం వ్యక్తం చేస్తున్నారు. గతంలో చేసిన అభివృద్ధి పనులకు బిల్లులు ఇప్పటి వరకు రాలేదు. ఇప్పుడు రూ.10 లక్షల పనులు చేస్తే ఈ డబ్బులు ఎప్పటికి వస్తాయో అని అనుమానాలు వ్యక్తం చేస్తున్నారు. అప్పులు చేసి అభివృద్ది పనులు చేయలేమని చాలా మంది సర్పంచులు చెబుతున్నారు. సీఎం తక్షణమే రూ. 10 లక్షలు రిలీజ్ చేస్తామంటే సంతోషించామని, ఇలాంటి మెలిక పెడతారనుకోలేదని సర్పంచులు అసహనం వ్యక్తం చేస్తున్నారు.
ప్రొసీడింగ్స్ కు సర్పంచుల నో రెస్పాన్స్
పెద్దపల్లి జిల్లా పరిషత్ చైర్మన్ పుట్ట మధు, గ్రామ పంచాయతీల అభివృద్ధికి స్పెషల్ ఫండ్ ప్రకటించాలని సీఎంను ప్రత్యేకంగా కోరారు. దీంతో సీఎం కేసీఆర్ జిల్లాలోని గ్రామ పంచాయతీలకు రూ.10 లక్షలు తక్షణమే రీలీజయ్యేలా ఆదేశిస్తాని హమీ ఇచ్చారు. ఫైనాన్స్ కమీషన్లకు సంబంధం లేకుండా స్పెషల్ ఫండ్ కాబట్టి ఇన్స్టంట్ ఎమౌంట్ రిలీజ్ అవుతుందని, డైరెక్టుగా జీపీ ఎకౌంట్లో పడుతాయని సర్పంచులు ఆశపడ్డారు. కానీ సీఎం ప్రకటించిన ఫండ్కు సంబంధించి చేయాల్సిన పనుల ప్రొసీడింగ్స్గత నెల 28న పెద్దపల్లి జిల్లా కలెక్టర్ రిలీజ్ చేశారు. ఆయా గ్రామాల్లో అభివృద్ధి పనులు చేసి ఎంబీలు పెట్టుకోవాలని సూచించారు. దీంతో సర్పంచులు అసహనం వ్యక్తం చేశారు. ప్రొసీడింగ్స్ పై సర్పంచులు ఎవరూ రెస్పాండ్ కావడం లేదు. సీఎం ప్రకటించిన నెలలోపే ప్రొసీడింగ్స్ ఇచ్చినా ఇప్పటి వరకు పనులు పూర్తి చేసేవాళ్లమని కొందరు సర్పంచులు చెబుతున్నారు. గతంలో జనరల్ ఫండ్స్ ద్వారా చేసిన అభివృద్ది పనులు పెండింగ్ లో పడినా, నాణ్యత లేకపోయినా ఆయా గ్రామ సర్పంచ్లపై కలెక్టర్లు చర్యలు తీసుకున్నారు. సీఎం ప్రత్యేక టైంలో ప్రకటించిన స్పెషల్ఫండ్ కావడంతో పనులు చేసినా, చేయకపోయినా తమకేమీ నష్టం లేదు కాబట్టి, అప్పులు చేసి అభివృద్ధి చేయబోమని సర్పంచులు అంటున్నారు.
ఎంబీ రికార్డు కాగానే పైసలు పడేలా చూడాలి
గతంలో చేసిన పనుల బిల్లులు ఇంకా రావాల్సి ఉంది. ఇప్పుడు ఎస్డీఎప్ పనులు చేయాలంటే మళ్లీ అప్పులు చేయాల్సి ఉంటుంది. గతంలో చేసిన అప్పులతోనే ఇబ్బంది పడుతున్నాం. మరోసారి అభివృద్ధి పనులు చేయాలంటే అప్పులు చేయాలి. చేసిన పనులకు సంబంధించి ఎంబీ రికార్డు కాగానే పైసలు రిలీజ్ అయ్యేలా చూస్తామంటే పనులు చేస్తం.
- సముద్రాల రమేశ్, సర్పంచ్, ఖమ్మంపల్లి, పెద్దపల్లి జిల్లా
