- దేశంలోనే తొలిసారిగా హైదరాబాద్లో నిర్వహణ
- ప్రారంభించనున్న సీఎం రేవంత్, మంత్రి శ్రీధర్బాబు
- 25 అంశాల్లో ఏఐ వాడకంపై రాష్ట్ర సర్కార్ రోడ్ మ్యాప్
- సమాజంపై ఏఐ ప్రభావం, నియంత్రణ, సవాళ్లపై సదస్సులో చర్చ
- పాల్గొననున్న 2 వేల మందికిపైగా నిపుణులు
హైదరాబాద్, వెలుగు : దేశంలోనే తొలిసారిగా రాష్ట్రంలో ఆర్టిఫిషియల్ ఇంటెలిజెన్స్(ఏఐ) సమిట్జరగబోతున్నది. గురు, శుక్రవారాల్లో రెండు రోజుల పాటు హైదరాబాద్ హెచ్ఐసీసీ వేదికగా ఈ సదస్సును నిర్వహించనున్నారు. ‘ప్రతి ఒక్కరికీ కృత్రిమ మేధ’ అనే థీమ్తో నిర్వహించనున్న ఈ సమిట్కు ప్రపంచం నలుమూలల నుంచి 2 వేల మందికిపైగా ఏఐ నిపుణులు హాజరుకానున్నారు. సీఎం రేవంత్రెడ్డి, ఐటీ, పరిశ్రమల శాఖ మంత్రి శ్రీధర్ బాబు సదస్సును ప్రారంభిస్తారు. ఇదే సదస్సులో రాష్ట్రంలో ఏఐ అడాప్టేషన్కు సంబంధించి రోడ్మ్యాప్ను సీఎం రేవంత్ విడుదల చేస్తారు.
25 అంశాలతో రోడ్ మ్యాప్ను సిద్ధం చేశారు. కాగా, ఈ సదస్సులో భాగంగా సాంకేతిక పరిజ్ఞానంతో చేపట్టే పరిశోధనలు, స్టార్టప్ డెమోలు, అభివృద్ధి దశలో ఉన్న కొత్త ప్రాజెక్టులను ప్రదర్శించనున్నారు. సమాజంపై ఏఐ ప్రభావం, నియంత్రణ, సవాళ్లపై చర్చిస్తారు. ఏఐ సెక్టార్లో పేరుపొందిన ఖాన్ అకాడమీ అధినేత సల్ఖాన్, ఐబీఎం ప్రతినిధి డానియెలా కాంబ్, ఎక్స్ప్రైజ్ ఫౌండర్ పీటర్ డయామండిస్ తదితర ప్రముఖులు ఇందులో పాల్గొంటారు.
ఈ ఈవెంట్ కోసం ఒక ప్రధాన వేదికతో పాటు నాలుగు అదనపు వేదికలను ఏర్పాటు చేశారు. కార్యక్రమంలో భాగంగా హైప్రొఫైల్ ప్యానెల్ డిస్కషన్స్, ఇంటరాక్టివ్ సెషన్లను ఏర్పాటు చేస్తున్నారు. ఏఐలో ప్రపంచ కంపెనీల దృష్టిని ఆకర్షించేందుకు తెలంగాణలో ఈ సదస్సును నిర్వహిస్తున్నారు. ఫోర్త్ సిటీలో భాగంగా 200 ఎకరాల విస్తీర్ణంలో ఏఐ సిటీని ఏర్పాటు చేస్తామని ఇప్పటికే రాష్ట్ర ప్రభుత్వం ప్రకటించింది.
