- రిపోర్ట్ ఆధారంగా అందరికీ న్యాయం జరిగేలా చూస్తా
- తనను కలిసిన మాల ప్రజాప్రతినిధులు, మాల మహానాడు నేతలకు వెల్లడి
హైదరాబాద్, వెలుగు: ఎస్సీ వర్గీకరణపై సుప్రీంకోర్టు ఇచ్చిన తీర్పునకు అనుగుణంగా త్వరలోనే ఒక కమిటీని ఏర్పాటు చేయనున్నట్టు సీఎం రేవంత్ రెడ్డి ప్రకటించారు. ఆ కమిటీ అన్నింటినీ స్టడీ చేసి ఇచ్చిన రిపోర్ట్ ఆధారంగా అందరికీ న్యాయం జరిగేలా చూస్తానని హామీ ఇచ్చారు. సెక్రటేరియెట్లో మాల సామాజిక వర్గం ప్రజాప్రతినిధులు, మాల మహానాడు నేతలు సీఎం రేవంత్ రెడ్డిని కలిశారు. ఇందులో ఎంపీ గడ్డం వంశీ, ఎమ్మెల్యేలు వివేక్ వెంకటస్వామి, మట్టా రాగమయి, నాగరాజు, మాల మహానాడు నేతలు చెన్నయ్య తదితరులు ఉన్నారు.
ఈ సందర్భంగా ఎస్సీ వర్గీకరణపై కోర్టు డైరెక్షన్కు అనుగుణంగా మాల, మాదిగలకు సరైన న్యాయం జరిగేలా చూడాలన్నారు. అలాగే, ఎస్సీ వర్గీకరణలో మాలలకు అన్యాయం జరగకుండా చూడాలని సీఎం రేవంత్ రెడ్డిని వారు కోరారు. దీనిపై సీఎం రేవంత్ రెడ్డి సానుకూలంగా స్పందించారు. ఎస్సీ వర్గీకరణపై కమిటీని నియమించి ఆ రిపోర్ట్ ఆధారంగా అందరికీ న్యాయం జరిగేలా చూస్తామని తెలిపారు.
