- ఆ లోపు పరిష్కరించాలని అధికారులకు సీఎం రేవంత్ ఆదేశాలు
- తహసీల్దార్, ఆర్డీఓ లెవెల్లోనే వేగంగా పరిష్కరించాలని ఆర్డర్స్
- లాగిన్లు ఇచ్చాక ఆలస్యం చేయడం సరికాదని వ్యాఖ్య
- అసెంబ్లీలో ధరణిపై వైట్పేపర్ పెట్టేందుకు సర్కారు కసరత్తు
హైదరాబాద్, వెలుగు : ధరణి పెండింగ్అప్లికేషన్లపై సీఎం రేవంత్ రెడ్డి సీరియస్ అయ్యారు. వీలైనంత త్వరగా అప్లికేషన్లను క్లియర్ చేయాలని ఉన్నతాధికారులను ఆదేశించారు. గడిచిన రెండున్నర నెలలు ఎలక్షన్ కోడ్ ఉండడం, కలెక్టర్లు, ఇతర రెవెన్యూ సిబ్బంది అంతా ఎన్నికల విధుల్లో ఉండడంతో అప్లికేషన్లు క్లియర్ కాలేదు. ఈ క్రమంలో రాష్ట్రవ్యాప్తంగా ఇంకా లక్షకు పైగా అప్లికేషన్లు పెండింగ్లో ఉన్నాయని సోమవారం ‘వెలుగు’లో పబ్లిష్ అయిన స్టోరీపై సీఎం రేవంత్రెడ్డి స్పందించారు. కోడ్ ముగియడంతో సోమవారం నుంచి కలెక్టరేట్లలో గ్రీవెన్స్ మొదలైంది.
కాగా, కలెక్టర్ల ఆధ్వర్యంలో నిర్వహించిన ప్రజావాణికి తొలిరోజు ధరణికి సంబంధించిన అర్జీలే అత్యధికంగా వచ్చినట్టు సీఎంకు తెలిసింది. దీంతో ధరణిలో పెండింగ్సమస్యల కోసం ఒక టైం బాండ్ పెట్టుకొని పరిష్కరించాలని అధికారులను సీఎం రేవంత్ రెడ్డి ఆదేశించారు. ప్రభుత్వ స్థాయిలో నిర్ణయం తీసుకోవాల్సిన అవసరం లేని అప్లికేషన్లను 10,15 రోజుల్లోనే పూర్తి చేసేలా పనిచేయాలన్నారు. ఇక ఇప్పటికే ధరణి పోర్టల్, పెండింగ్అప్లికేషన్లపై ఏర్పాటైన కమిటీ రికమండేషన్స్ను కూడా త్వరలోనే సమర్పించాలని సీఎం సూచించినట్టు తెలిసింది.
దీంతో పాటు బీఆర్ఎస్ ప్రభుత్వం తెచ్చిన ధరణి పోర్టల్ తీరుతెన్నులపై వచ్చే అసెంబ్లీ సమావేశాల్లో వైట్పేపర్ రిలీజ్ చేసేందుకు సిద్ధంగా ఉండాలని సీఎం సూచించడంతో ఉన్నతాధికారులు ఆ మేరకు కసరత్తు ప్రారంభించినట్టు సమాచారం.
కలెక్టర్ల నుంచి తహసీల్దార్లకు అప్లికేషన్లు
రాష్ట్రవ్యాప్తంగా ఎంపీఎన్నికల షెడ్యూల్కు ముందు ధరణి స్పెషల్ డ్రైవ్ నిర్వహించారు. ఆ టైంలో అన్ని రకాల మాడ్యూల్స్లో కలిపి 2.46 లక్షల అప్లికేషన్లు వివిధ దశల్లో పెండింగ్లో ఉన్నాయని తేల్చారు. స్పెషల్ డ్రైవ్లో లక్షకు పైగా అప్లికేషన్లు క్లియర్ చేశారు. ఆ తర్వాత ధరణి కమిటీ సూచనల మేరకు తహసీల్దార్లు, ఆర్డీఓలు, అడిషనల్ కలెక్టర్లకూ ధర ణిలో లాగిన్లు ఇచ్చారు. క్షేత్రస్థాయిలో ఎక్కడికక్కడ సమస్యలు పరిష్కరించేందుకే కింది స్థాయి అధికారులకు లాగిన్ అయి భూముల వివరాలు సరిచేసే అవకాశం కల్పించారు.
దీంతో కలెక్టర్లకు వెళ్లిన అప్లికేషన్లన్నీ ఇప్పుడు తహసీల్దార్లు, ఆర్డీఓల స్థాయిలో పరిష్కారానికి తిప్పి పంపించారు. ఈ క్రమంలో ధరణి పెండింగ్ అప్లికేషన్ల పరిష్కారం కొంత ఆలస్యమైనట్టు అధికారులు సీఎం రేవంత్ రెడ్డికి వివరించినట్టు తెలిసింది. ఈ క్రమంలోనే ప్రభుత్వ స్థాయిలో నిర్ణయం తీసుకునే అవకాశం లేని అప్లికేషన్లన్నింటినీ రాబోయే పది, పదిహేను రోజుల్లో పరిష్కరించనున్నారు.
ఇటు సిఫార్సులు.. అటు వైట్పేపర్..
ధరణిపై ఏర్పాటైన కమిటీ ఇప్పటికే పలు దఫాలుగా వివిధ శాఖలతో సమావేశమైంది. రైతులు, అధికారుల నుంచి వివరాలు తీసుకున్నది. రాష్ట్రంలో భూ సమస్యలు తీర్చేందుకు ఏం చేయాలనే దానిపై సిఫార్సులు సిద్ధం చేస్తోంది. భవిష్యత్లో రైతులకు ఎలాంటి ఇబ్బందులు లేకుండా భూ సమస్యలు రాకుండా ఉండేలా ధరణి కమిటీ రికమండేషన్స్ను రూపొందిస్తుంది. దీంతో పాటు గత సర్కారు తెచ్చిన ధరణి పోర్టల్ను అడ్డుపెట్టుకొని చేసిన అక్రమాలు, రైతులకు జరిగిన నష్టం, ప్రభుత్వ భూముల్లో అవకతవకలపై అసెంబ్లీలో వైట్ పేపర్ పెట్టేందుకు కూడా ప్రభుత్వం సిద్ధమవుతోంది.
ఇప్పటికే కొన్ని వివరాలను అధికారులు రెడీ చేశారు. రైతుల నుంచి తీసుకున్న కంప్లయింట్స్ను కూడా పరిశీలించి వైట్ పేపర్లో పెట్టనున్నారు. ఇందుకోసం పూర్తి రిపోర్ట్ తయారు చేస్తున్నారు. గత ప్రభుత్వంలో ఉన్న కొందరు ప్రభుత్వ, అసైన్డ్ భూములను అక్రమంగా పట్టాలుగా మార్చినట్టు గుర్తించారు. వారిపై చట్టపరంగా చర్యలు తీసుకునే దానిపైనా ప్రభుత్వం కసరత్తు చేస్తోంది.
