- కొండపోచమ్మ సాగర్, మల్లన్నసాగర్లోని నీటి లభ్యత, ఖర్చుపై రిపోర్ట్ రెడీ చేయండి
- వచ్చే నెల 1న టెండర్లకు సిద్ధంగా ఉండండి
- అధికారులకు సీఎం రేవంత్రెడ్డి ఆదేశం
హైదరాబాద్, వెలుగు: హైదరాబాద్కు 20 టీఎంసీల గోదావరి జలాలను తరలించేందుకు సమగ్ర నివేదిక రెడీ చేయాలని అధికారులను సీఎం రేవంత్రెడ్డి ఆదేశించారు. ఇదే అంశంపై శనివారం జూబ్లీహిల్స్లోని తన నివాసంలో ఇరిగేషన్, జలమండలి అధికారులతో ఆయన సమీక్షించారు. కొండపోచమ్మ సాగర్ లేదా మల్లన్న సాగర్ నుంచి నీటిని తరలించేందుకు ప్రాజెక్టుల్లోని నీటి లభ్యత, ఏ ప్రాజెక్టు నుంచి నీటి తరలింపు కోసం ఎంత ఖర్చవుతుందనే అంశాలపై పూర్తి అధ్యయనం చేయాలన్నారు.
వచ్చే నెల 1 నుంచి టెండర్ల ప్రక్రియ చేపట్టేలా కార్యాచరణ రూపొందించాలని ఆదేశించారు. మిషన్ భగీరథ అధికారులతో సమన్వయం చేసుకోవాలని సీఎం సూచించారు. కాగా.. రాష్ట్ర ప్రభుత్వం ప్రతిష్టాత్మకంగా చేపట్టిన మూసీ పునరుజ్జీవానికి 2 టీఎంసీల నీళ్లను కూడా తీసుకోనున్నారు. ప్రాజెక్టుల నుంచి హైదరాబాద్లోని జంట జలాశయాలకు నీటిని తరలించేందుకు ట్రంక్ పైప్లైన్లు వినియోగించనున్నారు.
పంప్హౌస్లు, పంప్లు, 2,400 ఎంఎం పైప్లైన్ (దాదాపు 40 కిలో మీటర్లు) ఘన్పూర్ నుంచి ముత్తంగి.. ఘన్పూర్ నుంచి ఉస్మాన్ సాగర్ వరకు వేయనున్నారు. వీటన్నింటికీ కలిపితే రూ.4,300 కోట్లు అవుతుందని అధికారులు అంచనా వేస్తున్నారు. సమీక్షలో పురపాలక శాఖ ముఖ్యకార్యదర్శి దానకిశోర్, జలమండలి ఎండీ అశోక్ రెడ్డి, ఇరిగేషన్ శాఖ కార్యదర్శి ప్రశాంత్ జె.పాటిల్ తదితరులు పాల్గొన్నారు.
