- వీలైనంత త్వరగా పూర్తి చేయాలని అధికారులకు సీఎం రేవంత్ ఆదేశం
- పాత కాంట్రాక్టర్తోనేకాల్వను తవ్వించండి
- పుట్టంగండి సిస్టర్న్కు రిపేర్లు చేయించాలని నిర్ణయం
హైదరాబాద్, వెలుగు: పాలమూరు–రంగారెడ్డి ప్రాజెక్టుపై సర్కార్ ప్రత్యేక దృష్టి సారించింది. ప్రాజెక్టులోని ప్యాకేజీ 3 పనులను వీలైనంత త్వరగా పూర్తి చేయాలని నిర్ణయించింది. ఆ దిశగా చర్యలు చేపట్టాలని అధికారులను సీఎం రేవంత్రెడ్డి ఆదేశించారు. బుధవారం హైదరాబాద్ జూబ్లీహిల్స్ లోని తన ఇంట్లో ఇరిగేషన్అధికారులతో ప్రాజెక్టుపై ఆయన రివ్యూ నిర్వహించారు.
ప్యాకేజీ 3లో భాగంగా నార్లాపూర్ రిజర్వాయర్ నుంచి ఏదుల రిజర్వాయర్ వరకు చేపట్టిన ప్రధాన కాల్వ తవ్వకం బండరాయి అడ్డుపడడం వల్ల ఆగిపోయింది. 8.32 కిలోమీటర్ల కాల్వలో 4.3 కిలోమీటర్ల మేర తవ్వడం పూర్తయింది. తొలుత ఈ ప్యాకేజీ కోసం రూ.416 కోట్ల అంచనాతో ప్రతిపాదనలు రూపొందించగా, బండరాయి అడ్డుపడడంతో అంచనాలను రూ.784 కోట్లకు పెంచారు.
ఈ క్రమంలోనే ఇటీవల జరిగిన కేబినెట్మీటింగ్లో దానికి ఆమోద ముద్ర పడలేదు. దీంతో తాజాగా సీఎం రేవంత్రెడ్డి దానిపై రివ్యూ చేశారు. పాత రేట్ల ప్రకారం పాత కాంట్రాక్టర్తోనే పనులు పూర్తి చేయించేలా చూడాలని అధికారులను సీఎం ఆదేశించారు. దీనిపై కాంట్రాక్టర్తో చర్చలు జరపాలని సంబంధిత సీఈకి సూచించారు. వాస్తవానికి టెండర్రద్దు చేయాలని భావించినా, ఖర్చు పెరిగే అవకాశం ఉండడంతో పాత కాంట్రాక్టర్తోనే పాత రేట్ల ప్రకారం పనులు చేయించాలని సర్కార్ భావిస్తున్నట్టు తెలిసింది.
పుట్టంగండి సిస్టర్న్కరాబ్..
హైదరాబాద్ కు తాగునీటిని సరఫరా చేసే పుట్టంగండి సిస్టర్న్కు రిపేర్లు చేయించాలని సర్కార్ నిర్ణయించింది. సిస్టర్న్కు డ్యామేజీ అయి రిజర్వాయర్, కెనాల్ తెగే పరిస్థితి ఏర్పడింది. దీంతో దానికి రిపేర్లు చేయించాలని అధికారులను సీఎం రేవంత్రెడ్డి ఆదేశించారు. అయితే రిపేర్లకు 3 నెలల సమయం పడుతుందని, దాని వల్ల హైదరాబాద్ కు నీటి సరఫరా ఆపాల్సి వస్తుందని అధికారులు వివరించగా.. ప్రత్యామ్నాయ చర్యల్లో భాగంగా సమాంతరంగా ఆల్టర్నేట్పైప్లైన్వేసి, నీటిని తరలిస్తే ఎంత ఖర్చవుతుందో అంచనాలు తయారు చేయాలని సీఎం సూచించినట్టు తెలిసింది.
పంప్హౌస్లో ఇప్పటికే 4 పంపులు ఉండగా, ఇంకో పంపునూ పెట్టుకునేందుకు అవకాశం ఉందని అధికారులు చెప్పినట్టు సమాచారం. దానితో రోజూ 650 క్యూసెక్కులను తీసుకెళ్లేందుకు అవకాశం ఉంటుందని అధికారులు చెబుతున్నారు. రిజర్వాయర్ను ఖాళీ చేసి చూస్తే లోపాలు తెలుస్తాయని అంటున్నారు. దాని ప్రకారం రిపేర్లకు వెళ్తే రూ.10 కోట్లలోపే అవుతాయంటున్నారు. కానీ కెనాల్స్కు లైనింగ్చేయిస్తే మాత్రం రూ.470 కోట్ల వరకు ఖర్చవుతుందని అంచనా వేస్తున్నారు.
