వరంగల్ వేదికగా జరిగిన కాంగ్రెస్ పార్టీ ప్రజా విజయోత్సవ సభలో.. సీఎం రేవంత్ రెడ్డి ఆసక్తికర కామెంట్స్ చేశారు. కేంద్ర మంత్రి కిషన్ రెడ్డి వైఖరిపై ఆగ్రహం వ్యక్తం చేస్తూ.. ఆయన తీరును ఎండగట్టారు. హైదరాబాద్ మూసీ రివర్ ఫ్రెంట్ డెవలప్ మెంట్ చేస్తుంటే కేంద్ర మంత్రి కిషన్ రెడ్డి అడ్డుకుంటున్నారని.. అడ్డమైన ఆరోపణలు చేస్తున్నారంటూ మండిపడ్డారు. అదే గుజరాత్ రాష్ట్రంలో సబర్మతి రివర్ ఫ్రెంట్ డెవలప్ మెంట్ చేస్తే పొగడ్తలు కురిపిస్తున్నారని.. మోదీకి గులాంగిరీ చేయటానికి సిగ్గుండాలంటూ ఆగ్రహం వ్యక్తం చేశారు సీఎం రేవంత్ రెడ్డి.
కిషన్ రెడ్డి అంటే నిన్నా మొన్నటి వరకు గౌరవం ఉండేదని.. ఇప్పుడు మర్యాద తీసుకోవటం కోల్పోయాడు అంటూ చురకలు అంటించారు సీఎం రేవంత్ రెడ్డి. తెలంగాణ రాష్ట్రం వచ్చిందంటేనే సోనియాగాంధీ దయ వల్ల అని.. ఇవాళ స్వేచ్ఛగా సభ పెట్టుకున్నాం అంటే అది సోనియా వల్లే అన్నారు రేవంత్ రెడ్డి. అలాంటి తెలంగాణ రాష్ట్ర ఏర్పాటును కించపరిచిన మోదీకి గులాంగిరీ చేయటానికి మనస్సు ఎలా వచ్చిందంటూ కిషన్ రెడ్డిని ప్రశ్నించారాయన.
ALSO READ | KCR అనే మొక్కను తెలంగాణ గడ్డపై మళ్ళీ మొలవనివ్వ: సీఎం రేవంత్
నువ్వు సేవ చేయాల్సింది మోదీకి కాదు.. నిన్ను గెలిపించిన సికింద్రాబాద్ ప్రజలకు.. ఆ ప్రజలకు కృతజ్ణతగా ఉండాలి కదా.. తెలంగాణ ప్రాంతాన్ని అవమానిస్తున్న ప్రధాని మోదీకి వత్తాసు పలకటానికి మనస్సు ఎలా వచ్చింది కిషన్ రెడ్డీ అంటూ బహిరంగ వేదికగా ప్రశ్నించారు సీఎం రేవంత్ రెడ్డి.
మోదీకి గులాంగిరీ చేయాలి అనుకుంటే.. గుజరాత్ రాష్ట్రం వెళ్లి గాడిదలు కాసుకో అంటూ తీవ్ర స్థాయిలో విరుచుకుపడ్డారు సీఎం రేవంత్ రెడ్డి. కాళోజీనే బతికి ఉంటే.. ఈ కిషన్ రెడ్డిని తెలంగాణ పొలిమేర వరకు తరిమి తరిమి కొట్టేవారని.. కిషన్ రెడ్డి ఇప్పటికైనా నీ వైఖరి మార్చుకో అంటూ సూచనలు చేశారు సీఎం రేవంత్ రెడ్డి. ఆంధ్రాలో పార్టీని భూస్థాపితం చేసుకుని.. తెలంగాణ ఇచ్చిన సోనియాగాంధీ కాళ్లు కడిగి.. ఆ నీళ్లను నెత్తిన చల్లుకోవాలంటూ కేంద్ర మంత్రి కిషన్ రెడ్డికి సూచించారు రేవంత్ రెడ్డి.
