హైదరాబాద్: సీఎం రేవంత్ రెడ్డి ఎస్ఎల్బీసీ టన్నెల్ వద్దకు వెళ్లనున్నారు. ఆదివారం (మార్చి 2) వనపర్తి జిల్లాలో పర్యటించనున్న సీఎం రేవంత్ రెడ్డి.. అక్కడి నుంచి నేరుగా సాయంత్రం 5 గంటలకు ప్రమాదానికి గురైన ఎస్ఎల్బీసీ టన్నెల్ దగ్గరికి వెళ్లనున్నారు. వనపర్తి సభ అనంతరం హెలికాప్టర్లో దోమలపెంటకు వెళ్లనున్న సీఎం.. అక్కడి నుంచి రోడ్డు మార్గంలో ఎస్ఎల్బీసీ టన్నెల్కు చేరుకోనున్నారు. టన్నెల్ వద్ద జరుగుతోన్న సహయక చర్యలను సీఎం పరిశీలించనున్నారు. రెస్య్కూ ఆపరేషన్పై అధికారులతో సమీక్ష నిర్వహించనున్నారు. సీఎం పర్యటన నేపథ్యంలో హైదరాబాద్ రేంజ్ ఐజీ సత్యనారాయణ నేతృత్వంలో టన్నెల్ వద్ద భద్రత ఏర్పాటు చేయనున్నారు.
కాగా, నాగర్ కర్నూల్ జిల్లాలోని దోమలపెంట వద్ద ఎస్ఎల్బీసీ టన్నెల్లో ప్రమాదం జరిగిన విషయం తెలిసిందే. టన్నెల్ పై కప్పు కూలడంతో అందులో 8 మంది కార్మికులు చిక్కుకుపోయారు. కార్మికులను రక్షించేందుకు 9 రోజులుగా టన్నెల్లో సహయక చర్యలు కొనసాగుతున్నాయి. సహయక బృందాలు ప్రమాద ఘటన స్థలానికి చేరుకోవడంతో రెస్క్యూ ఆపరేషన్ చివరి దశకు చేరుకుంది.
టన్నెల్లో బురద, నీళ్లు ఉబకడంతో రెస్య్కూ ఆపరేషన్ సవాల్గా మారింది. ప్రస్తుతం ఎస్ఎల్బీసీ టన్నెల దగ్గర జీపీఆర్ మార్కింగ్ చేసిన ప్రాంతంలో తవ్వకాలు కొనసాగుతున్నాయి. రెస్క్యూ టీమ్ మరికొన్ని గంటల్లో 4 మృతదేహాలు వెలికితీయనున్నట్లు సమాచారం. ఇప్పటికే టన్నెల్ వద్ద ఫోరెన్సిక్, వైద్య బృందాలు సిద్ధంగా ఉన్నాయి. మృతులను సొంత గ్రామాలకు తరలించేందుకు అంబులెన్స్ లు కూడా సిద్ధం చేశారు అధికారులు.
