హైదరాబాద్, వెలుగు: క్రిప్టో ప్లాట్ ఫామ్ కాయిన్ స్విచ్ తన వినియోగదారులు సైబర్దాడుల వల్ల డబ్బు పోగొట్టుకున్న వారికి పరిహారం చెల్లించడానికి కాయిన్ స్విచ్ కేర్స్ పేరుతో రూ.600 కోట్ల సహాయ నిధిని ప్రకటించింది. 2024 జులైలో వచ్చిన వజీర్ ఎక్స్ సైబర్ దాడి వల్ల చాలామంది క్రిప్టో వినియోగదారులు నష్టపోయారు. వీరిని ఆదుకునేందుకు ఈ కార్యక్రమాన్ని ప్రారంభిస్తున్నట్లు ప్రకటించింది.
వినియోగదారులు తమ డబ్బును తిరిగి పొందడంలో సహాయపడటమే కాకుండా భారతీయ క్రిప్టో కమ్యూనిటీని మరింతగా ప్రోత్సహించేందుకు ఈ నిధులను రెండేళ్ల పాటు ఉపయోగిస్తారు. ఈ కార్యక్రమం ద్వారా బాధిత వినియోగదారులు రివార్డ్‌ లను పొందవచ్చని, మార్కెట్‌‌లోకి తిరిగి ప్రవేశించవచ్చని కాయిన్ స్విచ్ తెలిపింది. వజీర్ ఎక్స్ సైబర్ దాడిలో డబ్బు పోగొట్టుకున్న వాళ్లందరూ ఈ ప్రోగ్రామ్‌‌లో పాల్గొనడానికి అర్హులు.
