- 7 జిల్లాల్లో 10 కన్నాతక్కువ టెంపరేచర్లు
- కుమ్రంభీం జిల్లా సిర్పూర్లో 8.1 డిగ్రీలు
హైదరాబాద్, వెలుగు: చలి తీవ్రత పెరగడంతో రాష్ట్రంలో టెంపరేచర్లు మరింత పడిపోయాయి. ఏడు జిల్లాల్లో 10 డిగ్రీల కన్నా తక్కువ ఉష్ణోగ్రతలు నమోదయ్యాయి. ఆయా జిల్లాలు ఆరెంజ్ అలర్ట్లో ఉన్నాయి. మరో నాలుగు జిల్లాల్లో 10.1 నుంచి 10.9 డిగ్రీల మధ్య రాత్రి టెంపరేచర్లు రికార్డయ్యాయి. మిగతా జిల్లాల్లో 11 నుంచి 18 డిగ్రీల మధ్య కనిష్ఠ ఉష్ణోగ్రతలు నమోదుకాగా.. 20 జిల్లాలు ఎల్లో అలర్ట్లో ఉన్నాయి. అత్యల్పంగా కుమ్రంభీం ఆసిఫాబాద్ జిల్లాలోని సిర్పూర్లో 8.1 డిగ్రీల కనిష్ట ఉష్ణోగ్రత నమోదైంది.
సంగారెడ్డి జిల్లా న్యాల్కల్లో 8.2, ఆదిలాబాద్ జిల్లా భీంపూర్లో 8.2, మెదక్ జిల్లా శివంపేటలో 8.9, నిజామాబాద్ జిల్లా కోటగిరిలో 9.7, కామారెడ్డి జిల్లా జుక్కల్లో 9.7, వికారాబాద్ జిల్లా మర్పల్లిలో 10 డిగ్రీల చొప్పున రాత్రి టెంపరేచర్లు నమోదయ్యాయి. జగిత్యాల జిల్లా మల్లాపూర్ లో 10.4, రాజన్న సిరిసిల్ల జిల్లా రుద్రంగిలో 10.6, సిద్దిపేట జిల్లా అక్బర్పేటలో 10.9, నిర్మల్ జిల్లా పెంబిలో 10.9 డిగ్రీల మేర కనిష్ట ఉష్ణోగ్రతలు
రికార్డయ్యాయి.
3 రోజులు మోస్తరు వర్షాలు..
బంగాళాఖాతంలో ఏర్పడిన ఫెంగల్ తుఫాను ప్రభావంతో రాష్ట్రంలోని పలు ప్రాంతాల్లో వచ్చే మూడు రోజులపాటు మోస్తరు వర్షాలు కురిసే అవకాశం ఉందని వాతావరణ శాఖ తెలిపింది. శనివారం ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహ బూబాబాద్, వరంగల్, హనుమకొండ జిల్లాల్లో వర్షం పడవచ్చని పేర్కొంది.
ఆదివారం రాష్ట్ర వ్యాప్తంగా, సోమవారం కరీంనగర్, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ, జనగామ, సిద్దిపేట, యాదాద్రి భువనగిరి, రంగారెడ్డి, హైదరాబాద్, మేడ్చల్ మల్కాజిగిరి జిల్లాల్లో మోస్తరు వర్షాలు పడొచ్చని తెలిపింది.
