వైరా, వెలుగు : ఖమ్మం జిల్లా వైరా మున్సిపాలిటీ11వ వార్డు సోమవరం వద్ద నిర్మిస్తున్న గ్రీన్ ఫీల్డ్ హైవే బ్రిడ్జిపై సిమెంటు కాంక్రీట్ స్లాబ్ పోస్తుండగా ఒక్కసారిగా కుప్పకూలింది. అక్కడే పని చేస్తున్న మహారాష్ట్ర, రాజస్థాన్లకు చెందిన నలుగురు కూలీలు స్వల్పంగా గాయపడ్డారు. స్థానికులు వారిని 108లో వైరాలోని ప్రైవేట్ హాస్పిటల్కు తరలించారు.
ఖమ్మం రింగ్రోడ్డు నుంచి ఏపీలోని దేవరపల్లి వరకు గ్రీన్ఫీల్డ్ హైవే నిర్మిస్తున్నారు. ఇందులో భాగంగా ఏడాదిన్నర కింద సోమవరం వద్ద బ్రిడ్జి పనులు ప్రారంభమయ్యాయి. గ్రీన్ఫీల్డ్ హైవే ప్రాజెక్టును పలువురు సబ్ కాంట్రాక్ట్కు తీసుకుని పనులు చేస్తున్నారు. ఖమ్మం నుంచి పెనుబల్లి వరకు ఉన్న 33 కిలోమీటర్ల పనులను రూ.722 కోట్లతో ఓ సబ్ కాంట్రాక్టర్ చేస్తున్నాడు. అయితే, నాసిరకం మెటీరియల్ వాడడం వల్లే స్లాబ్ పోస్తుండగా కుప్పకూలిందని స్థానికులు చర్చించుకుంటున్నారు. బ్రిడ్జి కూలిపోతున్న టైంలో కూలీలు గమనించి దూకడంతో పెద్ద ప్రమాదం తప్పింది.
