నిర్మల్, వెలుగు: బాసర ట్రిపుల్ ఐటీ విద్యార్థులకు నాణ్యమైన విద్యతోపాటు మెరుగైన వసతులు కల్పించాలని కలెక్టర్ అభిలాష అభినవ్ అధికారులను ఆదేశించారు. ట్రిపుల్ ఐటీ విద్యార్థులకు కల్పిస్తున్న సౌకర్యాలపై వీసీ వెంకటరమణ, అధ్యాపకులతో కలెక్టరేట్లోని తన ఛాంబర్లో మంగళవారం సాయంత్రం సమావేశం నిర్వహించారు. ఈ సందర్భంగా కలెక్టర్ మాట్లాడుతూ.. విద్యార్థులకు మెరుగైన వసతులు కల్పించాలన్నారు. కాలేజీలో పరిపాలన, మౌలిక సదుపాయాలు, ఉద్యోగాల కల్పన వంటి విషయాల్లో పురోగతి సాధించినట్లు తెలిపారు. క్యాంపస్ ప్లేస్మెంట్లతోపాటు, ప్రభుత్వ, ప్రైవేటు కంపనీల్లో కొలువులు సాధిస్తున్నారని పేర్కొన్నారు.
విద్యార్థులకు స్పోర్ట్స్, కల్చరల్ వంటి వివిధ అంశాల్లో శిక్షణ అందించాలని, సంబంధిత కమిటీలను ఏర్పాటు చేయాలని సూచించారు. ఎలాంటి సమస్యలున్నా తమ దృష్టికి తీసుకురావాలని, పరిష్కారానికి వెంటనే చర్యలు చేపట్టాలని ఆదేశించారు. ఈ సమావేశంలో ట్రిపుల్ఐటీ పరిపాలనా విభాగాధికారి రణధీర్ సాగి, అసోసియేటెడ్ డీన్స్ మహేశ్, పావని, ఇతర అధికారులు పాల్గొన్నారు.
