నిర్మల్, వెలుగు: ఎండలు దంచికొడుతున్న నేపథ్యంలో నిర్మల్ జిల్లాలోని మారుమూల ప్రాంతాల ప్రజలకు వెసులుబాటుగా టెలిఫోన్ ప్రజావాణి ప్రారంభించనున్నట్లు కలెక్టర్ అభిలాష అభినవ్ శనివారం ఓ ప్రకటనలో తెలిపారు. ఈ నెల 24 నుంచి ప్రతి సోమవారం ఉదయం 10.30 నుంచి 11 గంటల వరకు టెలి ఫోన్ ప్రజావాణి నిర్వహించనున్నట్లు కలెక్టర్ తెలిపారు. ప్రజలు ఇంటి వద్ద నుంచే 91005 77132 నంబర్ను సంప్రదించి నేరుగా తమ సమస్యలను తెలిపి, దరఖాస్తులను వాట్సాప్ ద్వారా పంపవచ్చన్నారు.
ఆ దరఖాస్తులను పరిశీలించి, ఆన్లైన్లో నమోదు చేసి పరిష్కరిస్తామని తెలిపారు. అలాగే 11 నుంచి మధ్యాహ్నం ఒంటిగంట వరకు యథావిధిగా సాధారణ ప్రజావాణి కార్యక్రమం జరుగుతుందని తెలిపారు. జిల్లాలోని దూర ప్రాంత ప్రజలు టెలిఫోన్ ప్రజావాణిని సద్వినియోగం చేసుకోవాలని కలెక్టర్ సూచించారు.
