మదనాపురం, వెలుగు: ఇందిరమ్మ ఇండ్ల లబ్ధిదారుల ఎంపిక పారదర్శకంగా జరిగేందుకు గ్రామ, మున్సిపల్ వార్డు కమిటీలను ఏర్పాటు చేసినట్లు కలెక్టర్ ఆదర్శ్ సురభి తెలిపారు. తహసీల్దార్ ఆఫీస్లో మండల అధికారులతో సమావేశం నిర్వహించారు.
ఈ పథకం కింద అర్హత ఉన్న వారిని మాత్రమే ఎంపిక చేయడంలో ఈ కమిటీలు కీలక పాత్ర పోషిస్తాయని చెప్పారు. జిల్లాలోని అన్ని గ్రామాలు, మున్సిపల్ వార్డుల నుంచి ఎంపీడీవోలు, మున్సిపల్ కమిషనర్ల నుంచి లిస్ట్ తెప్పించుకొని జిల్లా ఇన్చార్జి మంత్రి ఆమోదంతో కమిటీలను నియమిస్తూ ఉత్తర్వులు జారీ చేసినట్లు తెలిపారు.
గ్రామ, వార్డు కమిటీలు అర్హులైన లబ్ధిదారులను ఎంపిక చేశాక, తీర్మానం చేసి ఎంపీడీవోలు, మున్సిపల్ కమిషనర్లకు పంపాలని చెప్పారు. ఈ కమిటీలు ఈ నెల 21 నుంచి 24 వరకు గ్రామ సభలు నిర్వహించి లబ్ధిదారుల తుది జాబితా తయారు చేస్తాయని తెలిపారు.
