వనపర్తి, వెలుగు: జిల్లాలో మాతాశిశు మరణాలు తగ్గించాలని, పీహెచ్సీల్లో ప్రసవాల సంఖ్య పెంచేందుకు చర్యలు తీసుకోవాలని కలెక్టర్ ఆదర్శ్ సురభి ఆదేశించారు. బుధవారం కలెక్టరేట్ కాన్ఫరెన్స్ హాల్లో జిల్లా స్థాయి రివ్యూ మీటింగ్ నిర్వహించారు. జనవరి నుంచి సెప్టెంబర్ వరకు జిల్లాలో జరిగిన మాతాశిశు మరణాలు, అందుకు గల కారణాలను సమీక్షించారు. నలుగురు మహిళలు, 56 మంది శిశువులు చనిపోయినట్లు డీఎంహెచ్వో కమిటీ దృష్టికి తీసుకొచ్చారు. మాతృ మరణాలపై కారణాలు అడిగి తెలుసుకున్నారు.
ఈ సందర్భంగా కలెక్టర్ మాట్లాడుతూ హై రిస్క్ ఉన్న గర్భిణుల ఆరోగ్యంపై మెడికల్ ఆఫీసర్లు ప్రత్యేక శ్రద్ధ పెట్టాలని, తప్పనిసరిగా గత ఆరోగ్య పరిస్థితిపై వివరాలు అడిగి తెలుసుకోవాలని, ఆ వివరాలను ఏఎన్సీ చెకప్ లో నమోదు చేయాలని సూచించారు. హై రిస్క్ ఉన్న గర్భిణులకు ఈసీజీ టెస్ట్ చేయాలన్నారు. శిశు మరణాలపై కేసుల వారీగా కారణాలు లిఖిత పూర్వకంగా అందించాలని ప్రోగ్రాం ఆఫీసర్ ను ఆదేశించారు. అడిషనల్ కలెక్టర్ సంచిత్ గంగ్వార్, డీఎంహెచ్వో జయచంద్ర మోహన్, గైనకాలజిస్ట్ డాక్టర్ కిరణ్మయి, చిన్నమ్మ థామస్, సాయినాథ్ రెడ్డి పాల్గొన్నారు.
