భద్రాద్రికొత్తగూడెం, వెలుగు : గోదావరి వరదలపై ముందస్తు ఫ్లడ్ మేనేజ్మెంట్ ప్లాన్ రూపొందించాలని ఆఫీసర్లను కలెక్టర్ అనుదీప్ ఆదేశించారు. గోదావరి వరదలపై కలెక్టరేట్ లో మంగళవారం వివిధ శాఖల అధికారులతో నిర్వహించిన సమావేశంలో ఆయన మాట్లాడారు. వరదల టైంలో ఎటువంటి ప్రమాదాలు జరుగకుండా ప్లాన్ చేయాలన్నారు. ముంపు గ్రామాల ప్రజలను తరలించేందుకు పునరావాస కేంద్రాలను ఏర్పాటు చేయాలన్నారు. గోదావరి వరదలపై సమగ్ర కార్యాచరణ ప్రణాళికలు సిద్దం చేయాలని ఆఫీసర్లను ఆదేశించారు. రానున్న నాలుగు నెలల వరకు సరిపోయే విధంగా నిత్యావసర వస్తువుల స్టాక్ ఉంచాలని సివిల్ సప్లయీస్ఆఫీసర్ను ఆదేశించారు. వరద పర్యవేక్షణకు సెక్టోరియల్, జోనల్ అధికారులను నియమించనున్నట్టు తెలిపారు. అత్యవసర సమయాల్లో హెలికాప్టర్ సేవల కోసం హెలీప్యాడ్లు ఏర్పాటు చేయాలని ఆర్అండ్బీ ఆఫీసర్లను ఆదేశించారు.
వరద సమాచారాన్ని తెలుసుకుంటూ ప్రజలను అప్రమత్తం చేయాలన్నారు. వ్యాక్సిన్లను అందుబాటులో ఉంచుకోవాలని వైద్యాశాఖాధికారులకు సూచించారు. గొత్తికోయల ఆవాస ప్రాంతాల్లో పర్యటిస్తూ ఆరోగ్య పరిరక్షణ చర్యలు చేపట్టాలన్నారు. భద్రాచలంలో వరద నీటిని ఎత్తిపోసేందుకు మోటార్లను అందుబాటులో ఉంచాలన్నారు. భద్రాలచం సబ్ కలెక్టరేట్లో 24గంటలు పనిచేసే విధంగా ఫ్లడ్ కంట్రోల్ రూం ఏర్పాటు చేయాలన్నారు. లైఫ్ జాకెట్లు, గజ ఈతగాళ్లు, నాటు పడవలు, బోట్లు అందుబాటులో ఉంచాలన్నారు. మీటింగ్లో వివిధ శాఖల అధికారులు పాల్గొన్నారు.
ఓటర్ల నమోదుపై ఫోకస్ పెట్టాలి
ఓటర్ల నమోదు తక్కువగా ఉన్న మండలాలపై ఆఫీసర్లు ఫోకస్ పెట్టాలని కలెక్టర్ అనుదీప్ఆదేశించారు. ఈఆర్వో, ఏఈఆర్వోలు, ఎలక్షన్ డీటీలతో కలెక్టరేట్లో మంగళవారం నిర్వహించిన మీటింగ్లో ఆయన మాట్లాడారు. పినపాక, అశ్వాపురం, కరకగూడెం, బూర్గంపహడ్, ఆళ్లపల్లి మండలాల్లో ఓటరు నమోదు తక్కువగా ఉందన్నారు. కొత్తగూడెం, భద్రాచలం పోలింగ్ బూత్లలో 1,500కంటే ఎక్కువ ఓట్లు ఉన్నందున మరో పోలింగ్ బూత్ ఏర్పాటు కోసం నిర్దేశించిన ఫారంలో పొందుపర్చాలన్నారు. జూలై 11,12 తేదీల్లో పూర్తి స్థాయిలో ఓటర్ల నమోదు ప్రక్రియ పూర్తి చేయాలన్నారు. ప్రోగ్రాంలో అడిషనల్ కలెక్టర్ వెంకటేశ్వర్లు, డీఆర్వో అశోక్ చక్రవర్తి, చీఫ్ ఎలక్షన్ నోడల్ఆఫీసర్ మధుసూదనరావు, ఆర్డీఓలు, మున్సిపల్ కమిషనర్లు పాల్గొన్నారు.
గ్రూప్-4 ఎగ్జామ్కు ఏర్పాట్లు చేయాలి
జూలై 1న జరిగే గ్రూప్–4 ఎగ్జామ్కు అన్ని ఏర్పాట్లు పూర్తి చేయాలని ఆఫీసర్లను కలెక్టర్అనుదీప్ఆదేశించారు. కలెక్టరేట్లో చీఫ్ సూపరింటెండెంట్లు, లైజనింగ్, రూట్ఆఫీసర్లతో మంగళవారం నిర్వహించిన సమావేశంలో ఆయన మాట్లాడారు. ఉదయం 10 గంటల నుంచి మధ్యాహ్నం 12.30 గంటల వరకు పేపర్–1, మధ్యాహ్నం 2.30 గంటల నుంచి 5 గంటల వరకు పేపర్–2 పరీక్ష ఉంటుందన్నారు. జిల్లాలో 77 కేంద్రాల్లో ఎగ్జామ్ నిర్వహిస్తున్నామన్నారు. 27వేల మంది ఎగ్జామ్కు అటెండ్ కానున్నారని తెలిపారు. మీటింగ్ లో అడిషనల్ కలెక్టర్ వెంకటేశ్వర్లు
పాల్గొన్నారు.
