భద్రాద్రికొత్తగూడెం, వెలుగు: స్ట్రాంగ్రూమ్ వద్ద పటిష్ట బందో బస్తు ఏర్పాటు చేయాలని ఎన్నికల రిటర్నింగ్ ఆఫీసర్లను కలెక్టర్ డాక్టర్ ప్రియాంక అలా ఆదేశించారు. కొత్తగూడెంలోని ఈవీఎం వేర్ హౌజ్ నుంచి నియోజకవర్గ కేంద్రాల్లో ఏర్పాటు చేసిన స్ట్రాంగ్ రూంలకు పంపుతున్న ఈవీఎం, బ్యాలెట్ యూనిట్లు, కంట్రోల్యూనిట్లను శనివారం ఆమె పరిశీలించారు. స్ట్రాంగ్ రూంల వద్ద సీసీ కెమెరాలను ఏర్పాటు చేయాలన్నారు. రాజకీయ పార్టీల ప్రతినిధుల సమక్షంలో స్ట్రాంగ్ రూంలలో వాటిని భద్రపర్చాలన్నారు. అనంతరం స్ట్రాంగ్ రూంకు సీలు వేయాలన్నారు.
ఈ ప్రక్రియ మొత్తాన్ని వీడియో తీయాలన్నారు. అలాగే కలెక్టరేట్లో ఏర్పాటు చేసిన స్ట్రాంగ్ రూంను శనివారం కలెక్టర్ ప్రారంభించారు. ప్రొగ్రాంలో డీఆర్డీవో మధుసూదనరాజు, సహకార శాఖాధికారి వెంకటేశ్వర్లు, డీపీఆర్ఓ శ్రీనివాస్ పాల్గొన్నారు.
