హనుమకొండ, వెలుగు: టీజీ ఐపాస్ పథకంలో భాగంగా పెండింగ్ లో ఉన్న దరఖాస్తులకు త్వరగా అనుమతులు జారీ చేయాలని హనుమకొండ కలెక్టర్ ప్రావీణ్య ఆఫీసర్లను ఆదేశించారు. హనుమకొండ కలెక్టరేట్ లో సోమవారం నిర్వహించిన జిల్లా పరిశ్రమల ప్రమోషన్ కమిటీ సమావేశంలో కలెక్టర్ మాట్లాడారు. టీ- ప్రైడ్ పథకంలో భాగంగా 15 మంది ఎస్సీ, ఎస్టీ లబ్ధిదారులకు అనుమతులు మంజూరు చేశామని, వారికి రూ.46.49 లక్షల సబ్సిడీ మంజూరైనట్లు తెలిపారు.
టీజీ -ఐపాస్ పథకంలో భాగంగా 43 యూనిట్లకు 71 అనుమతుల కోసం దరఖాస్తు చేసుకున్నారని, వాటిలో 51 అనుమతులు వచ్చాయన్నారు. ఈ యూనిట్లు రూ.40.22 కోట్లతో ఏర్పాటు చేయడానికి పర్మిషన్లు ఇచ్చినట్లు పేర్కొన్నారు. ఈ యూనిట్ల ద్వారా 480 మందికి ఉపాధి కలుగుతుందన్నారు. అనంతరం ప్రధానమంత్రి విశ్వకర్మ పథకంపై సంబంధిత అధికారులతో రివ్యూ చేశారు.
18 రకాలైన కులవృత్తులకు ఈ పథకం వర్తిస్తుందని, డీపీవో, మెప్మా, మున్సిపల్ అధికారులు పథకంపై ప్రజలకు అవగాహన కల్పించాలని సూచించారు. కార్యక్రమంలో జిల్లా పరిశ్రమల కేంద్రం జీఎం నవీన్ కుమార్, ఇతర ఆఫీసర్లు పాల్గొన్నారు. అంతకుముందు నిర్వహించిన గ్రీవెన్స్లో జిల్లా వ్యాప్తంగా వివిధ సమస్యలపై 15 దరఖాస్తులు వచ్చాయని కలెక్టర్తెలిపారు. గ్రీవెన్స్లో డీఆర్వో గణేశ్, పరకాల ఆర్డీవో నారాయణ, అధికారులు పాల్గొన్నారు.
