నల్గొండ అర్బన్, వెలుగు : ఈనెల 7న సీఎం రేవంత్ రెడ్డి నల్గొండ జిల్లాలో పర్యటించనున్నారని, ఇందుకు అవసరమైన అన్ని ఏర్పాట్లు పూర్తిచేయాలని కలెక్టర్ ఇలా త్రిపాఠి అధికారులను ఆదేశించారు. సీఎం పర్యటన సందర్భంగా బుధవారం కలెక్టరేట్లో సూర్యాపేట జిల్లా ఎస్పీ సన్ ప్రీత్ సింగ్, రెవెన్యూ, పోలీస్, ఇరిగేషన్ అధికారులతో సమావేశం నిర్వహించారు. సీఎం బహిరంగ సభకు ఏర్పాట్లు, పోలీస్ బందోబస్తు తదితర అంశాలపై చర్చించారు. అనంతరం స్థానిక రైతుబజార్ వద్ద శంకుస్థాపన చేయనున్న స్కిల్ డెవలప్మెంట్ కేంద్రం, మున్సిపల్ అభివృద్ధి పనుల శంకుస్థాపన ఏర్పాట్లను ఆమె పర్యవేక్షించారు.
ఎన్జీ కళాశాల మైదానంలో నిర్వహించనున్న బహిరంగ సభ ఏర్పాట్లు, సభకు హాజరయ్యే వీఐపీలకు ఏర్పాట్లు, హెలిప్యాడ్ తదితర అంశాలను పరిశీలించారు. బ్రాహ్మణ వెల్లంల రిజర్వాయర్లోకి డెలివరీ ఛానల్ ద్వారా నీరు వదిలేందుకు చేసిన ఏర్పాట్లు, హెలిప్యాడ్, పైలాన్ ను పరిశీలించారు. అనంతరం కలెక్టర్ మీడియాతో మాట్లాడుతూ ప్రజాపాలన ప్రజా విజయోత్సవాల్లో భాగంగా ఈనెల 7న సీఎం రేవంత్ రెడ్డితోపాటు మంత్రులు, ఎమ్మెల్యేలు హాజరుకానున్నట్లు తెలిపారు. అనంతరం జిల్లా పరిషత్ సమావేశ మందిరంలో 2025--–26 సంవత్సరానికి సంబంధించి 15వ ఆర్థిక సంఘం నిధుల వినియోగంపై సమీక్ష నిర్వహించారు.
