- భద్రాద్రి కొత్తగూడెం కలెక్టర్ జితేశ్వి పాటిల్
భద్రాద్రికొత్తగూడెం, వెలుగు : ఇందిరమ్మ ఇండ్ల లబ్ధిదారుల తుది జాబితాను ఈ నెల 7న లోపు సిద్ధం చేయాలని భద్రాద్రికొత్తగూడెం కలెక్టర్జితేశ్ వి పాటిల్ఆఫీసర్లను ఆదేశించారు. కలెక్టరేట్ నుంచి పలు శాఖల ఆఫీసర్లతో మంగళవారం ఆయన టెలీ కాన్ఫరెన్స్ నిర్వహించారు. ఈ సందర్భంగా ఆయన మాట్లాడుతూ ఇందిరమ్మ ఇండ్ల లబ్ధిదారుల ఎంపిక పారదర్శకంగా ఉండాలన్నారు. ప్రతి దరఖాస్తుకు దరఖాస్తు దారుడి ఫొటో, ప్రస్తుతం నివాసం ఇంటి ఫొటో జతపర్చాలని చెప్పారు. 4 నాటికి రెవెన్యూ ఇన్స్పెక్టర్లు క్షేత్ర స్థాయిలో పర్యటించి లబ్ధిదారుల దరఖాస్తులు పూర్తి చేయాలన్నారు.
5న లబ్ధిదారుల జాబితాను తహసీల్దార్, పంచాయతీ ఆఫీసుల్లోని నోటీస్ బోర్డులో పెట్టాలని చెప్పారు. 6న లబ్ధిదారుల ఎంపికపై అభ్యంతరాలు స్వీకరించాలన్నారు. రెండు రోజుల్లో సర్వే డేటా ఎంట్రీ పూర్తి చేయాలని సూచించారు. సీఎం కప్ క్రీడా పోటీలకు అన్ని ఏర్పాట్లు చేయాలన్నారు. కలెక్టరేట్లో డిజాస్టర్ మేనేజ్మెంట్ బృందం కలెక్టర్ను కలిసింది. ఈ సందర్భంగా అడిషనల్ కలెక్టర్ వేణుగోపాల్ జిల్లాలో వరదలు, వర్షాల టైంలో తీసుకుంటున్న చర్యలు, నష్టాలను పవర్ పాయింట్ ప్రజెంటేషన్ ద్వారా వివరించారు. అనంతరం అవినీతి వ్యతిరేక వారోత్సవాల పోస్టర్ను కలెక్టర్ ఆవిష్కరించారు.
