భద్రాద్రికొత్తగూడెం, వెలుగు : జిల్లాలోని పరిశ్రమల యాజమాన్యాలు కార్పొరేట్ సోషలరెస్పాన్సిబిలిటీ(సీఎస్ఆర్) కింద 2 శాతం నిధులు ఇవ్వాలని పలువురు ఎమ్మెల్యేలు కోరారు. జిల్లాలోని ఎమ్మెల్యేలు, పరిశ్రమల ప్రతినిధులతో కలెక్టరేట్లో బుధవారం సీఎస్ఆర్ ఫండ్స్పై కలెక్టర్ జితేశ్ వి పాటిల్ ప్రత్యేక సమావేశం ఏర్పాటు చేశారు. కొత్తగూడెం, ఇల్లెందు, భద్రాచలం, పినపాక అసెంబ్లీ నియోజకవర్గ ఎమ్మెల్యేలు కూనంనేని సాంబశివరావు, కోరం కనకయ్య, తెల్లం వెంకట్రావ్, పాయం వెంకటేశ్వర్లు మాట్లాడుతూ జిల్లాలోని పరిశ్రమల యాజమాన్యాలు తప్పని సరిగా 2శాతం నిధులను సీఎస్ఆర్ కింద ఇచ్చేలా చర్యలు తీసుకోవాలన్నారు.
ఇక్కడి పరిశ్రమలు ఇచ్చే సీఎస్ఆర్ ఫండ్స్ను ఈ జిల్లాలోనే ఖర్చు చేసేలా రాష్ట్ర ప్రభుత్వం చొరవ చూపాలని కోరారు. సీఎస్ఆర్ నిధులతో మౌలిక సదుపాయాలు కల్పించేందుకు మొదటి ప్రాధాన్యత ఇవ్వనున్నట్టు కలెక్టర్ తెలిపారు. ఈ సమావేశంలో అడిషనల్ కలెక్టర్ వేణుగోపాల్, సింగరేణి, కేటీపీఎస్, ఐటీసీ, నవభారత్, బీటీపీఎస్ సంస్థలకు చెందిన ప్రతినిధులతో పాటు జీఎం ఇండస్ట్రీస్ తిరుపతయ్య, సీపీవో సంజీవరావు పాల్గొన్నారు.
