భద్రాచలం,వెలుగు : గ్రామసభలు నిర్వహించి భూములను సర్వే చేసి డీఎల్సీ సమావేశంలో ఆమోదించిన తర్వాతే పోడు వ్యవసాయం చేసుకోవడానికి హక్కు పత్రాలు అందిస్తామని , భూమి ఎంత వరకు ఉందో అంత వరకే సాగు చేసుకోవాలని కలెక్టర్ జితేశ్ వి పాటిల్ తెలిపారు. దుమ్ముగూడెం మండలం గౌరారం అటవీ రేంజ్ పరిధిలోని పైడిపల్లి లో మంగళవారం ఆయన ఐటీడీఏ పీఓ రాహుల్, ఆర్డీఓ దామోదర్తో కలిసి పర్యటించారు. గ్రామంలోని గిరిజన రైతులు ఇటీవల తమను వ్యవసాయం చేసుకోకుండా ఫారెస్ట్ ఆఫీసర్లు అడ్డుకుంటున్నారని హైకోర్టును ఆశ్రయించగా.. కలెక్టర్ విచారణ కోసం గ్రామానికి వచ్చారు.
క్షేత్రస్థాయిలో ఫారెస్ట్, రెవెన్యూ ఆఫీసర్ల సమక్షంలో కలెక్టర్ విచారించారు. హక్కు పత్రాల్లోని భూమిలో కాకుండా పక్కనే ఉన్న ఫారెస్ట్ భూమిలో చెట్లను నరికి కొందరు రైతులు సాగు చేస్తున్నారని ఫారెస్ట్ ఆఫీసర్లు వివరించారు. ఈ క్రమంలోనే గిరిజన రైతులు, ఫారెస్ట్ ఆఫీసర్ల మధ్య తరుచూ గొడవలు జరుగుతున్నట్లుగా గుర్తించామని కలెక్టర్ తెలిపారు. గ్రామసభ ద్వారా సర్వే ప్రకారం భూములకు హక్కుపత్రాలు ఇచ్చాక పక్క భూమిలోకి వెళ్లడం తగదని సూచించారు. కలెక్టర్ వెంట ఎఫ్ఆర్వో కనకమ్మ, దుమ్ముగూడెం తహసీల్దార్ మణిధర్, గిరిజన రైతులు ఉన్నారు.
