భద్రాద్రికొత్తగూడెం, వెలుగు : సమగ్ర కుటుంబ సర్వే వివరాలు సీక్రెట్ గా ఉంచాలని ఆఫీసర్లను భద్రాద్రికొత్తగూడెం కలెక్టర్జితేశ్వి పాటిల్ఆదేశించారు. కలెక్టరేట్లో పలు శాఖల ఆఫీసర్లకు బుధవారం నిర్వహించిన ఒక్కరోజు శిక్షణా తరగతుల్లో ఆయన మాట్లాడారు. సమగ్ర కుటుంబ సర్వేను రాష్ట్ర ప్రభుత్వం ప్రతిష్టాత్మకంగా చేపడుతోందన్నారు. ఈ సర్వేలో ప్రజల సామాజిక, ఆర్థిక, విద్య, ఉపాధి, రాజకీయ, కుల వివరాలను సేకరించాలని, ఇంటి యజమాని పేరు, కుటుంబసభ్యులు, రేషన్ కార్డు, ఆధార్కార్డు వివరాలు నమోదు చేయాలని సూచించారు.
పూర్తి చేసిన సర్వే దరఖాస్తు ఫారాలను ఎన్యూమరేటర్ తనకు నిర్దేశించిన డేటా ఎంట్రీ కేంద్రానికి వెళ్లి అప్ లోడ్ చేయించాలని చెప్పారు. అప్ లోడ్ చేసే టైంలో ఎటువంటి లోటుపాట్లు లేకుండా జాగ్రత్తలు తీసుకోవాలన్నారు. ఈ ప్రోగ్రాంలో అడిషనల్ కలెక్టర్లు వేణుగోపాల్, విద్యాచందన, జడ్పీ సీఈవో చంద్రశేఖర్, సీపీవో సంజీవరావు పాల్గొన్నారు.
