సంగారెడ్డి టౌన్, వెలుగు : స్థానిక సంస్థల ఎన్నికల్లో 650 మంది ఓటర్లకు ఒక పోలింగ్ కేంద్రాన్ని ఏర్పాటు చేయనున్నట్లు కలెక్టర్ క్రాంతి వెల్లడించారు. మంగళవారం సంగారెడ్డి కలెక్టరేట్ లో వివిధ రాజకీయ పార్టీల ప్రతినిధులతో సమావేశం నిర్వహించారు. ఈ సందర్భంగా కలెక్టర్ మాట్లాడుతూ.. 4 రెవెన్యూ డివిజన్ల పరిధిలో 647 జీపీలు ఉండగా కొత్తగా మరో 11 జీపీలు ఏర్పాటు చేశామని వీటన్నిటికీ ఎన్నికలు నిర్వహిస్తామని తెలిపారు.
స్థానిక సంస్థల ఎన్నికల కోసం సిద్ధం చేసిన ఓటర్ముసాయిదాలో తప్పులుంటే ఈ నెల 12 లోగా తెలియజేయాలని రాజకీయ పార్టీల ప్రతినిధులకు సూచించారు. 658 జీపీల్లో 5,718 వార్డులు 5,732 పోలింగ్ స్టేషన్లను ఏర్పాటు చేసినట్లు తెలిపారు. పురుష ఓటర్లు 4,42,352, స్త్రీలు 4,27739, ఇతరులు 52 మంది ఉన్నట్లు పేర్కొన్నారు.
ఈ నెల 12న అధికారులు అన్ని ఎంపీడీవో ఆఫీసుల్లో ఆయా మండలాలకు చెందిన రాజకీయాల పార్టీల ప్రతినిధులతో సమావేశాలు నిర్వహించి అభ్యంతరాలు స్వీకరిస్తారన్నారు. 17న అన్ని పంచాయతీలలో తుది జాబితాను ప్రచురిస్తామని చెప్పారు. అడిషనల్కలెక్టర్ చంద్రశేఖర్, డీపీవో సాయిబాబా, వివిధ పార్టీల ప్రతినిధులు తాహెర్ పాషా, మహమ్మద్ యాకుబ్అలీ, మల్లికార్జున్ పాల్గొన్నారు.
