కాశీబుగ్గ, వెలుగు: సిటీలో లింగ నిర్ధారణ పరీక్షలపై ప్రజలకు అవగాహన కల్పించాలని హనుమకొండ కలెక్టర్ ప్రావీణ్య ఆఫీసర్లను ఆదేశించారు. మంగళవారం హనుమకొండ కలెక్టరేట్లో పీసీఅండ్పీడీటీ జిల్లాస్థాయి సమన్వయ కమిటీ మీటింగ్లో కలెక్టర్ మాట్లాడుతూ స్కానింగ్ సెంటర్లలో ఆకస్మిక తనిఖీలు నిర్వహించాలని, పోలీసులు, స్వచ్ఛంద సంస్థల సహకారంతో డేకాయ్ ఆపరేషన్స్ చేపట్టాలని తెలిపారు. చట్టాన్ని అతిక్రమిస్తే కఠిన చర్యలు తీసుకుంటామన్నారు. .
గ్రామస్థాయిలో ఆశలు, ఏఎన్ఎంలు, అంగన్వాడీ కార్యకర్తలు గర్భిణులకు లింగ వివక్షతపై అవగాహనతోపాటు వారిపై నిఘా ఉంచేలా చర్యలు తీసుకోవాలని చెప్పారు. ఇదిలా ఉండగా, ఈ నెల 20న నిర్వహించనున్న జాతీయ నులిపురుగుల నివారణ దినోత్సవాన్ని విజయవంతం చేయాలని కలెక్టర్ పిలుపునిచ్చారు. ఈ సందర్భంగా అవగాహన పోస్టర్లను, బ్యానర్లను ఆవిష్కరించారు. జిల్లాలో మొత్తం 2,36,488 మంది పిల్లలకు మాత్రలు ఇవ్వనున్నట్లు తెలిపారు. కార్యక్రమంలో డీఎంహెచ్వో సాంబశివరావు, ఏసీపీ దేవేందర్ రెడ్డి, సంబంధిత అధికారులు పాల్గొన్నారు.
