భీమదేవరపల్లి, వెలుగు: మార్చి 31లోగా పనులు పూర్తి చేసి పీవీ స్మృతివనాన్ని అందుబాటులోకి తీసుకురావాలని హనుమకొండ కలెక్టర్ ప్రావీణ్య అధికారులను ఆదేశించారు. బుధవారం స్మృతి వనంలో జరుగుతున్న పనులను ఆమె పరిశీలించారు. క్యాంటీన్ ఇతర సౌకర్యాలు వాటి నిర్వహణ స్థానిక స్వశక్తి మహిళా సంఘం సభ్యులకు ఇచ్చే విధంగా, డిగ్రీ చదివిన వారికి ప్రత్యేక శిక్షణ ఇచ్చి గైడ్లా ఉపాధి ఇవ్వాలని సూచించారు.
అంతకుముందు భీమదేవరపల్లి మండలం వంగర శివారు ఫుడ్ ప్రాసెసింగ్ సమీపంలో నవోదయ పాఠశాల ఏర్పాటుకు చేసేందుకు కావాల్సిన 30 ఎకరాల మేర ప్రభుత్వ స్థలాన్ని కలెక్టర్ పరిశీలించారు. మండల పరిధిలోని రత్నగిరిలో జరుగుతున్న ఉపాధి హామీ పనులను ఆమె పరిశీలించి, ఈ ఏడాదికి 22 లక్షల పని దినాలను కల్పించాల్సిఉండగా, ఇప్పటివరకు 19 లక్షల పని దినాలు మాత్రమే కల్పించినట్లు ఆమె తెలిపారు. వంగర శివారులోని సోలార్ ప్లాంటు ఏర్పాటు కోసం త్వరలో అధికారులతో స్టడీ టూర్ ఏర్పాటు పై ప్రణాళిక రూపొందించాలని ఆదేశించారు.
