- భద్రాద్రికొత్తగూడెం కలెక్టర్ ప్రియాంక అల
భద్రాద్రికొత్తగూడెం, వెలుగు : జిల్లాలో లోక్ సభ ఎన్నికలు ప్రశాంతంగా నిర్వహించేందుకు అన్ని ఏర్పాట్లు చేపట్టామని కలెక్టర్ ప్రియాంక అల తెలిపారు. కలెక్టరేట్లో మంగళవారం పోలింగ్ సిబ్బంది మొదటి దశ ర్యాండమైజేషన్ పూర్తి చేశారు. ఈ సందర్భంగా కలెక్టర్ మాట్లాడుతూ ఎన్ఐసీ రూపొందించిన సాఫ్ట్ వేర్ను ఉపయోగిస్తూ ఆన్లైన్లో పోలింగ్ సిబ్బంది మొదటి దశ ర్యాండమైజేషన్ను నిర్వహించామన్నారు. కొత్తగూడెం, ఇల్లెందు, అశ్వారావుపేట, భద్రాచలం, పినపాక నియోజకవర్గాల పరిధిలో 962 పోలింగ్ కేంద్రాలున్నాయని తెలిపారు.
తొమ్మిది ఆక్సిలరీ పోలింగ్ స్టేషన్ల ఏర్పాటు కోసం రాష్ట్ర ఎన్నికల అధికారికి ప్రపోజల్స్ పంపించామన్నారు. ఎన్నికల కమిషన్ మార్గదర్శకాల ప్రకారం అదనంగా సిబ్బంది కేటాయింపు ప్రక్రియ చేపట్టామని తెలిపారు. ఈ సమావేశంలో అడిషనల్ కలెక్టర్ డీ.వేణుగోపాల్, ఎలక్షన్స్ సూపరింటెండెంట్ ధారా ప్రసాద్, ఎన్ఐసీ డీఐవో సుశీల్కుమార్, డీఎల్ఎంటీ సాయి కృష్ణ పాల్గొన్నారు.
1,11,369మెట్రిక్ టన్నుల ధాన్యం సేకరణ లక్ష్యం
భద్రాద్రికొత్తగూడెం జిల్లాలో 1,11,369మెట్రిక్ టన్నుల ధాన్యాన్ని సేకరించడం లక్ష్యంగా పెట్టుకున్నామని కలెక్టర్ ప్రియాంక అల తెలిపారు. మంగళవారం కలెక్టరేట్లో పలు శాఖల అధికారులతో నిర్వహించిన రివ్యూ మీటింగ్లో ఆమె మాట్లాడారు. జిల్లాలో 127 ధాన్యం కొనుగోలు కేంద్రాలు ఏర్పాటు చేస్తున్నామన్నారు. అవసరమైతే అదనపు ధాన్యం కొనుగోలు కేంద్రాలు ఏర్పాటు చేసేందుకు చర్యలు తీసుకోవాలని సూచించారు.
సీఎంఆర్ రైస్ మిల్లులను ఆకస్మికంగా తనిఖీ చేసి ధాన్యం కొనుగోళ్లలో తేడా లేకుండా చూడాలన్నారు. ప్రతి కొనుగోలు కేంద్రానికి ఇన్చార్జీని నియమించాలని చెప్పారు. కేంద్రాల్లో గన్నీ సంచులు, టార్పాలిన్లు అందుబాటులో ఉంచాలన్నారు. జిల్లాలో తాగు నీటి సమస్య లేకుండా చర్యలు చేపట్టాలని ఆఫీసర్లను ఆదేశించారు. గతంలో మంజూరైన పనుల పురోగతి వివరాలను అడిగి తెలుసుకున్నారు.
