- మే 4 నుంచి 6 వరకు హోమ్ ఓటింగ్ పూర్తి
- భద్రాద్రికొత్తగూడెం కలెక్టర్ ప్రియాంక అల
భద్రాద్రికొత్తగూడెం, వెలుగు : పార్లమెంట్ ఎన్నికలకు పక్కాగా ఏర్పాట్లు చేస్తున్నామని కలెక్టర్ ప్రియాంక అల పేర్కొన్నారు. కలెక్టరేట్లో సోమవారం ఏర్పాటు చేసిన విలేకర్ల సమావేశంలో ఆమె మాట్లాడారు. ఖమ్మం లోక్ సభ నియోజకవర్గానికి 35 మంది, మహబూబాబాద్ లోక్ సభకు 23 మంది అభ్యర్థులు పోటీ చేస్తున్నారని తెలిపారు.
ఖమ్మం పార్లమెంట్ నియోజకవర్గ పరిధిలో భద్రాద్రికొత్తగూడెం జిల్లాలోని కొత్తగూడెం, అశ్వారావుపేట అసెంబ్లీ నియోజకవర్గాలున్నాయన్నారు. మహబూబాబాద్ పార్లమెంట్ నియోజకవర్గ పరిధిలో జిల్లాలో ఇల్లెందు, పినపాక, భద్రాచలం నియోజకవర్గాలున్నాయన్నారు. జిల్లాలో 9,88,238 మంది ఓటర్లున్నారని తెలిపారు. జిల్లాలోని ఐదు నియోజకవర్గ కేంద్రాలకు ఈవీఎం, వీవీ ప్యాడ్లను పంపించామన్నారు.
జిల్లాలో మే 4వ తేదీ నుంచి ఆరో తేదీ వరకు హోమ్ ఓటింగ్ ప్రక్రియను పూర్తి చేస్తామన్నారు. పోలింగ్ కేంద్రాల్లో సీసీ కెమోరాల ఏర్పాటు, వెబ్ కాస్టింగ్ ద్వారా పోలింగ్ ప్రక్రియను చేపట్టేందుకు అవసరమైన ఏర్పాట్లు చేస్తున్నామన్నారు. జిల్లాలో 1163 పోలింగ్ కేంద్రాలను ఏర్పాటు చేశామని పేర్కొన్నారు. అధిక ఉష్ణోగ్రతల నేపథ్యంలో పోలింగ్ కేంద్రాల వద్ద పరిశుభ్రమైన తాగునీటి సౌకర్యంతో పాటు టెంట్లు వేస్తున్నామన్నారు. టాయ్లెట్లు, దివ్యాంగులకు ర్యాంప్లను ఏర్పాటు చేస్తున్నామని తెలిపారు. ఈ ప్రోగ్రాంలో అడిషనల్ కలెక్టర్ వేణుగోపాల్, ఎన్నికల సూపరింటెండెంట్ ధారా ప్రసాద్ పాల్గొన్నారు.
