మెదక్ టౌన్, వెలుగు: ఎన్నికల విధులు సమర్థవంతంగా నిర్వహించాలని జిల్లా ఎన్నికల అధికారి, కలెక్టర్ రాజర్షి షా అధికారులకు సూచించారు. సోమవారం జిల్లాలోని పీవో, ఏపీవో, పోలింగ్ సిబ్బందికి ప్రభుత్వ డిగ్రీ కళాశాలలో శిక్షణ ఇచ్చారు. ఈ సందర్భంగా కలెక్టర్ మాట్లాడుతూ.. ఎన్నికల విధులు నిర్వహించే అధికారులు, సిబ్బంది ట్రైనింగ్ క్లాస్లకు తప్పని సరిగా హాజరు కావాలన్నారు. పోలింగ్ డే రోజు పీవోలు తీసుకోవాల్సిన చర్యలు, బాధ్యతలపై క్లుప్తంగా వివరించారు.
మాక్ పోలింగ్ సందర్భంగా పాటించాల్సిన అంశాల గురించి వివరించారు. ఓటరు జాబితాలో పేరు ఉంటేనే లోనికి రానివ్వాలన్నారు. ఈవీఎమ్ల బాధ్యత పీవోలదేనని స్పష్టం చేశారు. పోలింగ్ ఏజెంట్ స్థానిక పోలింగ్ స్టేషన్లో ఉంటే వారికి ఓటరు జాబితాలో పేరు ఉంటేనే ఓటు వేయాలని, పోలింగ్ బూత్ ఏజెంట్ ఆ నియోజకవర్గంలో ఓటరు అయి ఉండాలన్నారు.
ఒక్కో ఎలక్షన్కు నిబంధనలు మారుతున్న నేపథ్యంలో పీవోలు శిక్షణ తరగతులు శ్రద్ధగా విని ఎన్నికలను సమర్థవంతంగా నిర్వహించాలని సూచించారు. కార్యక్రమంలో జిల్లా అడిషనల్ కలెక్టర్ వెంకటేశ్వర్లు, మెదక్, తూప్రాన్ ఆర్డీవోలు అంబదాస్ రాజేశ్వర్, జయచంద్ర, డీఈవో రాధాకిషన్, డీఎస్వో రాజిరెడ్డి, ఎన్నికల సిబ్బంది పాల్గొన్నారు.
వంద శాతం పోలింగ్ లక్ష్యం
స్వీప్ మెదక్ జిల్లా ఆధ్వర్యంలో ఎలక్ట్రోరల్ లిటరసీ క్లబ్ సభ్యులను భాగస్వాములను చేయాలని రూపొందించిన విద్యార్థి హామీ పత్రాన్ని కలెక్టర్ రాజర్షి షా, ఎస్పీ రోహిణి ప్రియదర్శిని ఆవిష్కరించారు. ఈ సందర్భంగా కలెక్టర్, ఎస్పీ మాట్లాడుతూ.. విద్యార్థులు, తల్లిదండ్రులకు, కుటుంబసభ్యులకు సమాచారం అందించి వంద శాతం పోలింగ్ జరిగే విధంగా కృషి చేయాలన్నారు.
