మెదక్, వెలుగు : అసెంబ్లీ ఎన్నికల్లో పోటీ చేసే అభ్యర్థులు నామినేషన్ దాఖలు చేసేటపుడు ఎన్నికల కమిషన్ నిబంధనల ప్రకారం తమకున్న స్థిర, చర ఆస్థులు, బ్యాంకు డిపాజిట్లు, నగదు వివరాలతో అఫిడవిట్ సమర్పించాలని జిల్లా ఎన్నికల అధికారి, కలెక్టర్ రాజర్షిషా సూచించారు. గురువారం ఎస్పీ రోహిణి ప్రియదర్శిని, అడిషనల్ కలెక్టర్ వెంకటేశ్వర్లు, మెదక్, నర్సాపూర్ రిటర్నింగ్ ఆఫీసర్లు రాజేశ్వర్, శ్రీనివాస్ తో కలిసి మీడియాతో మాట్లాడారు. అభ్యర్థులు అఫిడవిట్ ఇవ్వడంతో పాటు, తమపై ఉన్న క్రిమినల్ కేసుల గురించి న్యూస్ పేపర్లు, టీవీల్లో మూడు సార్లు డిక్లరేషన్ ఇవ్వాల్సి ఉంటుందన్నారు.
శుక్రవారం నుంచి నామినేషన్ల ప్రక్రియ ప్రారంభం కానుండగా మెదక్, నర్సాపూర్ ఆర్డీఓ ఆఫీస్ల్లో ఏర్పాట్లు చేసినట్టు తెలిపారు. నామినేషన్ దాఖలు చేసేటప్పుడు అభ్యర్థితో పాటు, నలుగురు మాత్రమే ఆర్ఓ ఆఫీస్లోకి అనుమతి ఉంటుందన్నారు. ఆన్లైన్లో కూడా నామినేషన్ దాఖలు చేసే అవకాశం ఉందన్నారు. రోజు వారి దాఖలైన నామినేషన్ల వివరాలు, అఫిడవిట్లను డిస్ప్లే చేస్తామని పేర్కొన్నారు.
నో యువర్ క్యాండిడేట్ యాప్లో నామినేషన్ వేసిన అభ్యర్థుల పూర్తి వివరాలు అప్ లోడ్ చేస్తామని వివరించారు. ఎవరైనా గుగుల్ ప్లేస్టోర్ నుంచి ఈ యాప్ డౌన్ లోడ్ చేసుకుని ఎన్నికల్లో పోటీచేసే అభ్యర్థుల గురించి తెలుసుకునే అవకాశం ఉందన్నారు. నామినేషన్ల ప్రక్రియ సందర్భంగా మెదక్, నర్సాపూర్ లోని ఆర్ఓ ఆఫీస్ల వద్ద పటిష్ట బందోబస్తు ఏర్పాటు చేస్తున్నట్టు ఎస్పీ రోహిణి ప్రియదర్శిని తెలిపారు.
వరి ధాన్యం కొనుగోలు సమస్యల కోసం కంట్రోల్ రూమ్
జిల్లా వరి ధాన్యం కొనుగోలుకు సంబంధించిన కంట్రోల్ రూమ్ను రైతులు వినియోగించుకోవాలని కలెక్టర్ రాజర్షి షా సూచించారు. ఏవైనా సమస్యలుంటే రైతులు 9281103685 నెంబర్కు కాల్ చేయవచ్చన్నారు. ప్రతి రోజు ఉదయం. 8 గంటల నుంచి సాయంత్రం 6 గంటల వరకు అందుబాటులో ఉంటుందన్నారు. కార్యక్రమంలో జిల్లా పౌర సరఫరాల శాఖ అధికారి, సివిల్ సప్లయీస్ మేనేజర్ హరిక్రిష్ణ, సిబ్బంది సాదిక్ హుస్సేన్, డిప్యూటీ తహసీల్దార్ పాల్గొన్నారు.
ALSO READ : ఐటీ రెయిడ్స్తో బీజేపీకి సంబంధం లేదు : కిషన్ రెడ్డి
