గుడిహత్నూర్, వెలుగు : గిరిజన ప్రాంతాల్లో పోషణ్అభియాన్‌ కార్యమ్రాన్ని పక్కాగా అమలు చేయాలని కలెక్టర్ రాజర్షిషా అధికారులను ఆదేశించారు. శుక్రవారం ఇంద్రవెల్లి మండలం మర్కగూడ, గిన్నెర, పాటగూడ, లాల్‌టేకిడి గ్రామాల్లో కలెక్టర్ పర్యటించి వర్షాలకు దెబ్బతిన్న వంతెనలు, రోడ్లను పరిశీలించారు. అనంతరం ఆయా అంగన్వాడీ కేంద్రాల్లో నిల్వ ఉన్న సరుకులు, రికార్డులను తనిఖీ చేశారు. మధ్యాహ్న భోజనాన్ని పరిశీలించి చిన్నారులకు వడ్డించారు.
మొబైల్‌ యాప్‌ ద్వారా నమోదు చేస్తున్న హాజరు ప్రక్రియను పరిశీలించారు. ఈ సందర్భంగా కలెక్టర్ మాట్లాడుతూ నాణ్యతా ప్రమాణాలు పాటించి మెనూ ప్రకారం గర్భిణులు, బాలింతలు, చిన్నారులకు పౌష్టికాహారాన్ని అందించాలని అంగన్వాడీ టీచర్లకు సూచించారు. బలమైన ఆహారం అందించినప్పుడే పిల్లలు ఆరోగ్యంగా ఉంటారని తెలిపారు. ఆయన వెంట డీఆర్‌డీవో సాయన్న, పీఆర్‌ఈఈ శివరామ్, పీఆర్‌డీఈఈ రమేశ్, ఏసీడీపీవో మిల్కా, అంగన్వాడీ టీచర్లు, సిబ్బంది తదితరులు ఉన్నారు.
