నిజామాబాద్/ జక్రాన్పల్లి, వెలుగు: ఇందిరమ్మ ఇండ్ల కోసం దరఖాస్తు చేసుకున్న వారు అర్హులా? కాదా? నిర్ధారించేందుకు చేపట్టిన పైలెట్ సర్వేను శనివారం కలెక్టర్ రాజీవ్గాంధీ హనుమంతు పరిశీలించారు. దరఖాస్తులను పరిశీలించి జక్రాన్పల్లి మండలం మాదాపూర్ లో గ్రౌండ్ విజిట్ చేశారు.
దరఖాస్తుదారులు సొంత జాగా కలిగి ఉన్నారా? ప్రస్తుతం ఎవరి ఇంట్లో నివాసం ఉంటున్నారు? అద్దె ఇంటి ఓనర్ ఎవరు? పెంకుటిల్లా? డాబా ఇళ్లా తదితర వివరాలు సేకరించి అప్లోడ్ చేయాలని పంచాయతీ సిబ్బందికి సూచించారు. అర్హులు మాత్రమే ఇంటి స్కీం లబ్ధి పొందేలా రిపోర్టు అందించాలని
కోరారు.
హాస్టల్స్ పరిశీలన
సర్కారు హాస్టల్స్లో ఉంటూ చదువుకునే పిల్లల పట్ల ప్రత్యేక శ్రద్ధ వహించాలని సిబ్బందికి కలెక్టర్ సూచించారు. జక్రాన్పల్లి మండలంలోని కేజీబీవీ గర్ల్స్హాస్టల్ను సందర్శించి పలు సూచనలు చేశారు. సమస్యలను తహసీల్దార్ల దృష్టికి తీసుకెళ్లాలన్నారు.
కొత్త ఓటర్ల నమోదు
గ్రామ పంచాయతీలలో కొనసాగుతున్న ఓటర్ లిస్టు సవరణ ప్రత్యేక కార్యక్రమాన్ని మాదాపూర్లో కలెక్టర్ పరిశీలించారు. మరణించిన ఓటరు పేరును లిస్టు నుంచి తొలగించాలని, కొత్త ఓటర్లను చేర్చడానికి వారు దరఖాస్తులో తెలిపిన ఇళ్లకు వెళ్లి నిర్ధారణ చేసుకోవాలన్నారు. ఆయన వెంట ఆర్మూర్ ఆర్డీవో రాజాగౌడ్ ఉన్నారు.
