నిజామాబాద్, వెలుగు: గుర్తు తెలియని వాహనాలు ఢీకొని మరణించిన లేక తీవ్రంగా గాయపడిన కేసులు త్వరగా విచారించి ప్రభుత్వపరిహారం అందేలా చూడాలని కలెక్టర్ రాజీవ్గాంధీ సూచించారు. గురువారం కలెక్టరేట్లో మీటింగ్ నిర్వహించి మాట్లాడారు. జిల్లాలో 32 హిట్ అండ్ రన్ కేసులు నమోదయ్యాయని, 27 ఘటనలకు సంబంధించి బాధితులను గుర్తించామన్నారు.
ఆర్డీవోల నేతృత్వంలో కేసులు పరిష్కరించి మృతుల కుటుంబాలకు బీమా కౌన్సిల్ ద్వారా రూ.2 లక్షలు, తీవ్రంగా గాయపడిన బాధితులకు రూ.50 వేల నష్టపరిహారం అందేలా ప్రతిపాదనలు పంపాలని కోరారు. బోధన్ సబ్ కలెక్టర్ వికాస్ మహతో, అదనపు డీసీపీ బస్వారెడ్డి, ఆర్డీవో రాజేంద్రకుమార్, ఆర్టీవో ఉమామహేశ్వర్రావు, ట్రాఫిక్ ఏసీపీ నారాయణ, డీఎంహెచ్వో డాక్టర్ రాజశ్రీ తదితరులు పాల్గొన్నారు.
