మహబూబ్ నగర్ కలెక్టరేట్, వెలుగు: మహబూబ్ నగర్– చించోలి హైవే పనులు స్పీడప్ చేయాలని కలెక్టర్ రవి నాయక్ సంబంధిత అధికారులను ఆదేశించారు. మహబూబ్ నగర్ నుంచి చించోలి వరకు నిర్మిస్తున్న 167 హైవే పనులపై బుధవారం కలెక్టరేట్ మీటింగ్ హాల్లో రెవెన్యూ, అటవీ శాఖ, నేషనల్ హైవే అధికారులతొ కలెక్టర్ రివ్యూ మీటింగ్ నిర్వహించారు.
ఈ సందర్భంగా కలెక్టర్ మాట్లాడుతూ హైవే నిర్మాణంలో భాగంగా భూ సేకరణ వేగంగా పూర్తి చేయాలన్నారు. ఇప్పటికే సేకరించిన భూములకు సంబంధించి నష్ట పరిహారం చెల్లింపులో ఆలస్యం చేయకుండా యజమానులకు పరిహారం అందేలా చర్యలు తీసుకోవాలని ఆదేశించారు. జిల్లాలో 60 కిలోమీటర్ల రోడ్ నిర్మాణం జరగాల్సి ఉండగా, 40 కిలోమీటర్ల మేర పనులు పూర్తయ్యాయని, మిగిలిన పనులు త్వరగా పూర్తయ్యేలా చూడాలన్నారు. అడిషనల్ కలెక్టర్ మోహన్ రావు, నేషనల్ హైవే ఈఈ రమేశ్, ఆర్డీవో నవీన్ కుమార్, ఫారెస్ట్ ఆఫీసర్ సత్యనారాయణ పాల్గొన్నారు.
