మరికల్, వెలుగు: శ్రద్ధతో చదువుకుని ఉన్నత శిఖిరాలను అధిరోహించాలని కలెక్టర్ సిక్తా పట్నాయక్ సూచించారు. బుధవారం రాత్రి మరికల్ గురుకుల కాలేజీలో గురుకుల నిద్ర చేశారు. క్లాస్ రూమ్లకు వెళ్లి విద్యార్థులతో మాట్లాడి సమస్యలు అడిగి తెలుసుకున్నారు.
కాంపౌండ్ వాల్ ఎత్తు తక్కువగా ఉండడంతో పాములు వస్తున్నాయని, కిటికీలు ఊడిపోతున్నాయని వాటిని బాగు చేయించాలని కోరారు. విద్యార్థులకు అర్థమయ్యేలా చదువు చెప్పాలని సూచించారు. భోజనం గది, రికార్డులను పరిశీలించారు.
వంట ఏజెన్సీపై చర్యలు తీసుకోవాలి
నారాయణపేట: మెనూ ప్రకారం విద్యార్థులకు భోజనం పెట్టని ఏజెన్సీలపై చర్యలు తీసుకోవాలని కలెక్టర్ ఆదేశించారు. పట్టణంలోని గ్రౌండ్ స్కూల్ను కలెక్టర్ విజిట్ చేశారు. మెనూ ప్రకారం కర్రీ ఎందుకు వండ లేదని నిర్వాహకులను నిలదీశారు. 20 ఏండ్లుగా ఏజెన్సీ నడుపుతున్న నిర్వాహకులు.. 6 నెలల బిల్లులు రాకపోతే మెనూ ప్రకారం భోజనం పెట్టరా? అని ఆగ్రహం వ్యక్తం చేశారు. మెనూ పాటించని ఏజెన్సీ నిర్వాహకులకు మోమో జారీ చేయాలని డీఈవో గోవిందరాజులును ఆదేశించారు.
