వనపర్తి, వెలుగు: పార్లమెంట్ ఎన్నికలను పారదర్శకంగా నిర్వహించేందుకు రానున్న 72 గంటలు అత్యంత కీలకమని, - పూర్తి స్థాయిలో నిఘా ఉంచాలని ఎన్ఫోర్సుమెంట్ ఆఫీసర్లను కలెక్టర్ తేజస్ నందలాల్ పవార్ ఆదేశించారు. గురువారం కలెక్టరేట్ లోని కాన్ఫరెన్స్ హాల్లో ఎన్ఫోర్స్మెంట్, నోడల్, సెక్టోరియల్ ఆఫీసర్లతో మీటింగ్ నిర్వహించారు. ఓటర్లను ప్రలోభపెట్టేందుకు చేసే ప్రయత్నాలను అడ్డుకోవాలని, బాధ్యులను పట్టుకొనేందుకు సమన్వయంతో పని చేయాలని ఆదేశించారు.
ఎక్కడ చిన్న అనుమానం వచ్చినా వెంటనే పోలీస్ ఆఫీసర్లకు, తనకు సమాచారం ఇవ్వాలని సూచించారు . బ్యాంకుల నుంచి ఎక్కువ మొత్తం విత్డ్రా చేసిన ఖాతాదారులపై నిఘా పెట్టాలన్నారు. లిక్కర్ షాపుల ఓనర్లు రూల్స్ బ్రేక్ చేస్తే కేసులు పెట్టాలన్నారు. విధుల్లో నిర్లక్ష్యం చేస్తే కఠిన చర్యలు తప్పవని హెచ్చరించారు. అన్ని పోలింగ్ కేంద్రాల్లో మౌలిక వసతులు, నీడ ఏర్పాటు చేయాలని ఆదేశించారు. అడిషనల్ కలెక్టర్లు సంచిత్ గంగ్వార్, నగేశ్, డీఎస్పీ వెంకటేశ్వర రావు, ఆర్డీవో పద్మావతి, స్పెషల్ డిప్యూటీ కలెక్టర్ వెంకటేశ్వర్లు పాల్గొన్నారు.
