వనపర్తి, వెలుగు: ఓటరు జాబితాలో తప్పులు లేకుండా తయారు చేయాలని కలెక్టర్ తేజస్ పవార్ సూచించారు. బుధవారం కలెక్టరేట్లో జిల్లా, నియోజకవర్గ ట్రైనర్లతో రివ్యూ నిర్వహించి పవర్ పాయింట్ ప్రజెంటేషన్ ద్వారా పలు సూచనలు చేశారు. ఈ సందర్భంగా కలెక్టర్ మాట్లాడుతూ ఎన్నికలు సజావుగా, నిష్పక్షపాతంగా నిర్వహించడానికి తప్పులు లేని ఓటరు జాబితా తయారు చేయాల్సిన అవసరం ఉందన్నారు. ఫారం 6, 7,8 పై బీఎల్వోలకు అవగాహన కల్పించాలన్నారు.
ఎలక్షన్ సెక్షన్ సూపరింటెండెంట్ రమేశ్రెడ్డి, ట్రైనర్లు పాల్గొన్నారు.
గద్వాల: తప్పులు లేకుండా ఓటర్ జాబితాను రెడీ చేయాలని గద్వాల కలెక్టర్ పుల్లూరు క్రాంతి ఆఫీసర్లను ఆదేశించారు. కలెక్టరేట్ మీటింగ్ హాల్ లో ఫొటో ఎలక్ట్రోల్ స్పెషల్ సమ్మరీ రివిజన్–2023పై నియోజకవర్గ స్థాయి మాస్టర్ ట్రైనర్ల శిక్షణ, అవగాహన కార్యక్రమాన్ని నిర్వహించారు. ఈ సందర్భంగా కలెక్టర్ మాట్లాడుతూ బీఎల్వోలు గరుడ యాప్ ఉపయోగించేలా చూడాలన్నారు. ఈ నెల 27 వరకు పెండింగ్ లో ఉన్న ఫామ్స్ కంప్లీట్ చేయాలని ఆదేశించారు. పోలింగ్ స్టేషన్లను తనిఖీ చేసి సౌలతులు ఉండేలా చూసుకోవాలన్నారు. అడిషనల్ కలెక్టర్ అపూర్వ్ చౌహాన్ పాల్గొన్నారు.
