రామచంద్రాపురం, వెలుగు : నెల రోజుల వ్యవధిలో పెండింగ్ పనులన్నీ పూర్తి చేయాలని కలెక్టర్ వల్లూరి క్రాంతి అధికారులను ఆదేశించారు. సోమవారం తెల్లాపూర్ మున్సిపాలిటీ పరిధిలో పర్యటించి పలు అభివృద్ధి పనులను తనిఖీ చేశారు. అనంతరం రెవెన్యూ, మున్సిపల్, ఇరిగేషన్ శాఖల అధికారులతో రివ్యూ మీటింగ్ నిర్వహించారు. ఈ సందర్భంగా కలెక్టర్మాట్లాడుతూ.. తెల్లాపూర్ పరిధిలోని మూడు చెరువులకు హద్దులు నిర్ణయించి ఫెన్సింగ్ ఏర్పాటుకు ఆదేశాలు జారీ చేసినట్లు చెప్పారు. మున్సిపల్ ఆఫీస్ పక్కన కొత్తగా నిర్మిస్తున్న ఫంక్షన్ హాల్ పనులను త్వరగా పూర్తి చేసి అందుబాటులోకి తీసుకురావాలన్నారు.
సర్వే నంబర్ 323 లో హాస్పిటల్, పీహెచ్సీ సెంటర్ పనులను మొదలు పెట్టాలని ఇందుకోసం శాఖపరమైన ప్రతిపాదనలు పంపాలని అధికారులను ఆదేశించారు. రెవెన్యూ, ఇరిగేషన్ శాఖలు సమన్వయంతో పనిచేసి ఎఫ్టీఎల్, బఫర్ జోన్ల మార్కింగ్ చేయాలని సూచించారు. మండల వ్యాప్తంగా 4 వేలకు పైగా ఎల్ఆర్ఎస్ అప్లికేషన్లు వచ్చాయని, వారంలోగా వాటిని పూర్తి చేసి నివేదిక అందించాలని అధికారులకు ఆదేశాలు జారీ చేశారు.
