యాదాద్రి, వెలుగు: రుణాలు తీసుకున్న రైతుల అకౌంట్స్ ప్రాబ్లమ్స్ 15లోగా క్లియర్ చేయాలని కలెక్టర్ వినయ్ కృష్ణారెడ్డి ఆదేశించారు. శుక్రవారం కలెక్టరేట్‌లో బ్యాంకర్లు, అగ్రికల్చర్ ఆఫీసర్లతో రుణమాఫీపై రివ్యూ నిర్వహించారు. ఈ సందర్భంగా కొందరు రైతులకు రుణమాఫీ ఎందుకు కాలేదని కలెక్టర్ బ్యాంకర్లను ప్రశ్నించారు. దీంతో ఎల్డీఎం రామకృష్ణ రుణమాఫీ వివరాలను వెల్లడించారు. జిల్లాలో 2018 డిసెంబర్ 11 నాటికి రుణం పొందిన 39,186 మంది రైతులకు రూ. 202. 46 కోట్లు మాఫీ కావాల్సి ఉందన్నారు.
అయితే బ్యాంకులు విలీనం కావడం వల్ల ఐఎఫ్ఎస్సీ నెంబర్లు, లోన్ రెన్యువల్ చేసుకోవడం వల్ల అకౌంట్స్ నెంబర్లు మారిపోవడంతో ఇబ్బందులు ఏర్పడ్డాయని వివరించారు. అనంతరం కలెక్టర్ మాట్లాడుతూ అగ్రికల్చర్ ఆఫీసర్లు, బ్యాంకర్లు జాయింట్‌గా 2018 నాటి రైతుల ఖాతాల నెంబర్లు గుర్తించి, రుణాలు మాఫీ అయ్యేలా చూడాలని ఆదేశించారు. ఈ మీటింగ్లో అడిషనల్ కలెక్టర్ ఏ భాస్కర్రావు, డీఏవో అనురాధ, బ్యాంకర్లు, అగ్రికల్చర్ ఆఫీసర్లు ఉన్నారు.
