హోలీ ఎందుకు చేసుకుంటారు.. అనేదానికి దీనికి పురాణాల్లో లెక్కలేనన్ని కథలు చెప్తారు. ఆ కథలేవ్ తెలవకున్నా... పిల్లలకు, పెద్దోళ్లకు, వీళ్లకు వాళ్లకు అని లేదు... హోలీ అంటే అందరికి పెద్ద రంగుల పండుగ. పిల్లలైతే మూడు నాలుగు రోజుల ముందు నుంచే హోలీకి రెడీ అవుతుంటరు. రంగు ప్యాకెట్లు కొందామని, కలర్ గన్ తెచ్చి నీళ్లల రంగు కలిపి ఆడుదామని.. ఒక దగ్గర అస్సలు ఉండరు. పెద్దోళ్లకేమో దోస్తులను కలిసే టైమ్ ఇది. ఎక్కడో ఉండే దోస్తు కూడా ఇయ్యాల ఇంటి ముందుకొచ్చి రంగు ప్యాకెటు. గుడ్డు చేతుల పట్టుకొని నవ్వుతూ కనిపిస్తడు. ఇంత నడుస్తది కాబట్టే ఈ రంగుల పండుగ చుట్టూ పాజిటివిటీ ఉంటది ఎప్పుడూ. రంగులు చల్లుకోవడంలో సంబురం ఉంటది. ఆ సంబురాన్ని దగ్గరికి తీసుకోవుడే హ్యాపీనెస్.
రంగు మంచిదే!
'మరక మంచిదే' అని చెప్పి సర్ఫ్ ఎక్సెల్ డిటర్జెంట్ పౌడర్ సూపర్ హిట్ అడ్వర్టయిజ్ మెంట్ లు చేసింది. అవన్నీ చూసే ఉంటారు కదా! హోలీ కోసం కూడా ఈమధ్య ఒక యాడ్ చేసింది సర్ఫ్ ఎక్సెల్. ఈ యాడ్ లో ఒక చిన్నమ్మాయి వరుసగా అపార్ట్ మెంట్ లు ఉండే ఏరియాలో సైకిల్ పై తిరుగుతుంటది. అప్పటికే ఆ ఏరియాలో పిల్లలంతా జోరుగా హోలీ ఆడుతుంటరు. ఆ చిన్నమ్మాయి ...నా మీద రంగు చల్లరా.. అనడుగుతది. పిల్లలంతా హుషారుగా రంగులు జల్లుతుంటరు. 'ఇంకా... ఇంకా...' అని వాళ్ల దగ్గర ఉన్న రంగులన్నీ అయిపోయేదాక వాళ్లను ఆడిస్తది. సరిగ్గా అప్పుడే. ఒక ఇంటి దగ్గర ఆగి వచ్చేసెయ్ అందరి దగ్గర రంగులు అయిపోయినయ్' అని పిలుస్తది ఆ ఇంట్లో నుంచి ఒక చిన్నబ్బాయి బయటికొస్తడు. అబ్బాయి ముస్లిం నమాజ్ కు పోవాలి. అతడిని తన సైకిల్ మీద ఎక్కించుకొని మసీద్ దగ్గర దింపుతది అమ్మాయి. 'సమాజ్ చేసొస్త' అంటాడు అబ్బాయి. 'సరే, కానీ తిరిగొచ్చినంక మాత్రం నీకు రంగు పడుతది" అని నవ్వుతది ఆ అమ్మాయి. పిలగాడు 'సరే' అని నవ్వుకుంట మసీద్ లోకి పోతడు.
Also Read:-హోలీ పండుగ..హైదరాబాదీలకు సీపీ సీవీ ఆనంద్ మాస్ వార్నింగ్..
ఇది యాడ్ కథ మనకిష్టమైన వాళ్లతో ఇష్టంగా రంగుల పండుగ చేసుకోవుడు మంచిదే అని చెప్పి యాడ్ ముగుస్తుంది. అంతే. ఈ యాడ్ ఉన్నదని కాదు కానీ, మామూలుగా హోలీ పండుగంటేనే వీళ్లు వాళ్లు అనే ఆలోచనలు లేకుండా పాజిటివ్ ఫీలింగ్ తో చేసుకునే పండుగ..అదే కదా హ్యాపీనెస్..
కాముడిని కాల్చుడు ఫేమస్
పిల్లలు హోలీ పండుగ సంబురాలను నాలుగు రోజుల ముందునుంచే మొదలుపెడుతరు. పండుగకు ముందు రోజు రాత్రి కాముడిని కాల్చడమన్నది సంప్రదాయం, కాముడిని దహనం చేయడమన్న ఆలోచనతోనే ఒక సంబురంగా హోలీ చేసుకుంటరు. అయితే పిల్లలకు తెలిసేది కాముడిని కాల్చడమన్న పనొక్కటే. ఇందుకోసం కాముడి బొమ్మను తయారు చేయాలీ కాబట్టి పైసలు కావాలి. ఇంటింటికి తిరిగి వినాయక చవితికి చందాలు అడిగినట్టే కాముడిని కాల్చడానికి పైసలు అడుగుతరు. ఇట్లా పైసలు అడటడానికి కోలాటం కూడా ఆడుతరు. రెండు చిన్న కర్రలు పట్టుకొని కోలాటం ఆడటం పిల్లలకు పెద్ద సెలబ్రేషన్.. వాళ్లకు హోలీ మీద ఎగ్జయిట్ మెంట్ వచ్చేది కూడా ఇప్పట్నించే ఇక హోలీ రోజైతే రంగుల ప్యాకెట్లు, బాటిళ్లల నింపుకున్న కలర్ నీళ్లతో పెద్ద పండుగ చేస్తరు పిల్లలు.. వాళ్ల హ్యాపీనెస్ అది. కోడి గుడ్లు.. టమాటాలు.. నెత్తిమీద కొట్టడం కూడా వాళ్లకు సంతోషానిచ్చేపనే.. మరిఇంకెందుకు ఆలస్యం.. పదండి 2025 మార్చి 14న అందరం రంగులు జల్లుకుంటూ హోలీ ఆడుదాం.. సంతోషంగా ఉందాం.. !
అందర్నీ కలిపే హోలీ ..
అన్ని పండుగల లెక్కనే హోలీకి చిన్న ప్రత్యేకత ఏంటంటే ఈ పండుగ కూడా అందరినీ ఒక దగ్గరికి చేరుస్తది. ఎప్పుడో దూరమైన దోస్తులు కూడా హోలీ పండుగ వచ్చిందంటే కలుస్తుంటారు. ఒకే కాలనీలో ఉండేటోళ్లు, అపార్ట్ మెంట్ లో ఉండేటోళ్లను అందరినీ ఒక దగ్గరికి చేర్చే పండుగ హోలీ.. మామూలుగా అయితే, గుడ్డు, టమాటలు నెత్తిమీద కొడుతుంటే వాసనకి ఎలాగో ఉండాలి గాని చాలామంది. మన దగ్గర పండుగరోజు దీన్నొక సిలబ్రేషన్ లెక్కనే అనుకుంటరు. రంగులు మంచివి కావు, పర్యావరణానికి హాని చేస్తవి లాంటి మాటలన్నీ పక్కనబెట్టి చూస్తే, హోలీ ఒక పాజిటివ్ పండుగ, వయసుతోటి సబంధం లేకుండా అందరికీ హ్యాపీనెస్ తెచ్చిపెట్టే పండుగ..
