- త్వరలోనే ఉత్తర్వులు జారీచేస్తం : సీఎండీ
హైదరాబాద్, వెలుగు : సింగరేణిలో 2,364 మంది బదిలీ వర్కర్లను జనరల్ మజ్దూర్లుగా రెగ్యులరైజ్ చేస్తామని సంస్థ సీఎండీ ఎన్.బలరాం తెలిపారు. ఈ మేరకు త్వరలో ఉత్తర్వులు జారీచేస్తామని శుక్రవారం ఒక ప్రకటనలో ఆయన వెల్లడించారు. సంస్థలో చేరినప్పటి నుంచి ఏడాదిలో అండర్గ్రౌండ్ మైన్స్లో 190 రోజులు, ఉపరితల గనులు, విభాగాల్లో 240 రోజులు డ్యూటీ చేసిన వారిని రెగ్యులరైజ్ చేస్తామని ఆయన వెల్లడించారు. వచ్చే నెల 1 నుంచి వారిని జనరల్ మజ్దూర్లుగా గుర్తిస్తామన్నారు.
ఈ నేపథ్యంలో సంస్థ అభివృద్ధికి క్రమశిక్షణ, అంకితభావంతో పనిచేయాలని ఆయన సూచించారు. జనరల్ మజ్దూర్లుగా రెగ్యులరైజ్ చేయడంతో మరింత బాధ్యతాయుతంగా వ్యవహరించాలన్నారు. ఈ ఏడాదిలో కంపెనీ ఆధ్వర్యంలో వెయ్యికిపైగా ఇంటర్నల్ ఉద్యోగాలను భర్తీ చేయబోతున్నామని తెలిపారు. కాగా.. ఏడాదిలోనే నిర్ణీత మస్టర్లు పూర్తిచేసిన వారిని జనరల్ మజ్దూర్లుగా రెగ్యులరైజ్ చేయడంపై కార్మికులు హర్షం వ్యక్తం చేశారు.
ALSO READ : వాల్టా చట్టానికి పదును..చెరువుల రక్షణకు సర్కారు చర్యలు
సింగరేణిలో కారుణ్య నియామకాలు, డిపెండెంట్ నియామకాల ద్వారా సంస్థలో చేరిన వారిని తొలుత బదిలీ వర్కర్లుగా నియమిస్తారు. ఏడాది కాలం పనిచేసిన తర్వాత కనీస మస్టర్లు పూర్తిచేస్తే జనరల్ మజ్దూర్లుగా పర్మినెంట్ ఉద్యోగులుగా గుర్తిస్తారు. ఉన్నత విద్యార్హతలు కలిగిన వీరంతా కంపెనీలో ఇంటర్నల్ ఉద్యోగాల ద్వారా పదోన్నతులు పొందడానికి అర్హత లభిస్తుంది. అలాగే క్వార్టర్ల కేటాయింపులో ప్రాధాన్యత ఉంటుంది.
ఏరియాల వారీగా రెగ్యులరైజ్ అయిన ఉద్యోగులు
సింగరేణి వ్యాప్తంగా కార్పొరేట్ ఏరియాలో 25 మంది, కొత్తగూడెంలో 17, ఇల్లందులో 9, మణుగూరులో 21, భూపాలపల్లిలో 476, రామగుండం-1 ఏరియాలో 563, రామగుండం-2 ఏరియాలో 50, రామగుండం-3, అడ్రియాల ప్రాజెక్టు ఏరియాలో 240, శ్రీరాంపూర్ ఏరియాలో 655, మందమర్రి ఏరియాలో 299, బెల్లంపల్లిలో 9 మందిని రెగ్యులరైజ్ చేయనున్నారు. వారిలో 243 మంది మహిళలు ఉన్నారు.
