- మంచిర్యాల శివారులో ఇండస్ట్రియల్ హబ్ ఏర్పాటుకు అడుగులు
- వేంపల్లి, ముల్కల్ల, పోచంపాడ్ గ్రామాల్లో 295 ఎకరాల భూసేకరణ
- నోటిఫికేషన్ ఇవ్వకుండానే రైతుల సంతకాలు తీసుకుంటున్న వైనం
- బలవంతంగా సంతకాలు సేకరిస్తున్న ఇద్దరు కాంగ్రెస్ నాయకులు
- అధికారులు చేయాల్సిన పనులు లీడర్లు చేయడంపై విమర్శలు
మంచిర్యాల, వెలుగు: మంచిర్యాల శివారులో ఇండస్ట్రియల్హబ్, ఐటీ పార్క్ ఏర్పాటు కోసం సేకరిస్తున్న భూములకు ఎకరానికి రూ.13 లక్షల పరిహారం ప్రకటించారు. 180 గజాల ప్లాట్, ఇందిరమ్మ ఇంటితో పాటు కుటుంబంలో ఒకరికి జాబ్ కల్పిస్తామన్నారు. అయితే జిల్లా కేంద్రానికి కూతవేటు దూరంలో ఉన్నప్పటికీ అసైన్డ్భూములంటూ పరిహారం తక్కువగా నిర్ణయించారని పలువురు ఆవేదన వ్యక్తం చేస్తు న్నారు. ఈ ప్రాంతంలో పట్టా భూములకు మార్కెట్రేటు ఎకరానికి రూ.50 లక్షల పైనే పలుకుతోంది. దీంతో పట్టా భూములతో సమానంగా పరిహారం చెల్లించాలని కోరుతున్నారు.
295 ఎకరాలు సేకరణ
ఇండస్ట్రియల్ హబ్, ఐటీ పార్క్ఏర్పాటు కోసం హాజీపూర్ మండలంలోని వేంపల్లి, ముల్కల్ల, పోచంపాడ్ గ్రామాల శివార్లలోని 295 ఎకరాల భూములను సేకరిస్తున్నారు. టీజీఐఐసీ ఆధ్వర్యంలో ఈ భూముల్లో రోడ్లు, కరెంట్, వాటర్, డ్రైనేజీలు వంటి సౌలత్లు డెవలప్మెంట్ చేసిన తర్వాత పారిశ్రామికవేత్తలకు కేటాయించేందుకు కసరత్తు చేస్తున్నారు. ఇందుకోసం వేంపల్లి శివారులోని 156, 157, 158, 159 సర్వే నంబర్లతో పాటు పోచంపాడ్శివారు 1 సర్వే నంబర్లోని భూములను సేకరించేందుకు ప్రభుత్వం వాలంటరీ ల్యాండ్అక్విజిషన్ జీవో జారీ చేసింది. అయితే టీజీఐఐసీ సేకరిస్తున్న ఈ భూముల్లో ఎక్కువగా ఎస్సీలకు చెందిన అసైన్డ్ ల్యాండ్స్ఉన్నాయి. ఉమ్మడి రాష్ట్రంలో అప్పటి వైఎస్సార్ ప్రభుత్వ హయాంలో ఈ భూములను పంపిణీ చేశారు. వీటిని సేకరించేందుకు కొద్దిరోజులుగా ఎంజాయ్మెంట్ సర్వే నిర్వహిస్తున్నారు.
2013 యాక్ట్ ప్రకారం ఇవ్వాలి
2013 భూసేకరణ చట్టం ప్రకారం అసైన్డ్ ల్యాండ్స్కు సైతం పట్టా భూములతో సమానంగా పరిహారం చెల్లించాలని పలువురు రైతులు కోరుతున్నారు. ఈ యాక్ట్ ప్రకారం ఆ ప్రాంతంలో గత మూడేండ్లలో జరిగిన లావాదేవీలను పరిగణనలోకి తీసుకొని ఆ రేటుకు మూడు రెట్లు పరిహారం ఇవ్వాల్సి ఉంటుంది. గవర్నమెంట్ వాల్యూ ఎకరానికి రూ.5 లక్షలు ఉన్నట్లయితే దానికి మూడు రెట్లు కలిపి రూ.20 లక్షలు, దానికి వంద శాతం సొలాటియం లెక్కించి మొత్తం రూ.40 లక్షలు చెల్లించాలని కోరుతున్నారు. అసైన్డ్భూములకు పట్టాలతో సమానంగా పరిహారం చెల్లించాలన్న సుప్రీంకోర్టు తీర్పును ప్రస్తావిస్తున్నారు.
ఆ ఇద్దరు లీడర్ల హల్చల్
ఇండస్ట్రియల్హబ్, ఐటీ పార్క్ కోసం భూసేకరణ విషయంలో హాజీపూర్ మండలానికి చెందిన ఇద్దరు కాంగ్రెస్ లీడర్లు హల్చల్ చేస్తున్నట్టు ఆరోపణలు వస్తున్నాయి. అసైన్డ్ భూములు చేతులు మారడం, పడావుగా ఉండడంతో ప్రజాప్రయోజనాల కోసం ప్రభుత్వం తీసుకుంటోందని.. పరిహారం రాదని, ఇచ్చినంత తీసుకొని భూములను అప్పగించాలని రైతులపై ఒత్తిడి చేస్తున్నారు. అందుకు ఒప్పుకోకపోతే బెదిరింపులకు గురిచేస్తున్నారని వాపోతున్నారు. ఈ నెల 5న మంచిర్యాల గోదావరి రోడ్లోని ఓ ఫంక్షన్హాల్లో రైతులతో మీటింగ్ ఏర్పాటు చేసి రూల్స్కు విరుద్ధంగా వారి నుంచి సంతకాల సేకరణ వరకు అధికారులు చేయాల్సిన పనులను వీరే ముందుండి చేయడంపై విమర్శలు వెల్లువెత్తుతున్నాయి.
బలవంతంగా సంతకాలు తీసుకుంటున్రు
గ్రామంలోని భూమి లేని పలువురు ఎస్సీలకు అప్పటి వైఎస్సార్ ప్రభుత్వం అసైన్డ్ పట్టాలు ఇచ్చింది. మా అమ్మ లక్ష్మి పేరిట అర ఎకరం భూమి ఉంది. అక్కడ ఇండస్ట్రియల్ పార్క్పెడుతామంటూ భూములు లాక్కుంటున్నరు. బలవంతంగా రైతుల సంతకాలు తీసుకుంటున్నరు. ప్రభుత్వమే మాకు న్యాయం చేయాలి.
- గజెల్లి శేఖర్, ముల్కల్ల
భూసేకరణపై అనుమానాలున్నయ్
గతంలో కాంగ్రెస్ ప్రభుత్వం మా తాత లింగయ్య పేరిట రెండెకరాల అసైన్డ్ పట్టా ఇచ్చింది. తాత చనిపోయిన తర్వాత మా తండ్రి పేరిట విరాసత్ చేసుకుందామని రెవెన్యూ ఆఫీస్కు పోతే అట్ల చేయరాదన్నరు. ఇటీవల ఇండస్ట్రియల్ హబ్ కోసం కొంతమంది లీడర్లు భూములు ఇవ్వాలని ఒత్తిడి చేస్తున్నరు. ఈ భూసేకరణపై మాకు అనుమానాలున్నయ్. - మాడుగుల సతీశ్, వేంపల్లి
