మంచిర్యాల, వెలుగు: ఎల్లంపల్లి ప్రాజెక్టు ముంపు బాధితులమైన తమకు 15 ఏండ్లయినా పరిహారం పైసలు, ఇందిరమ్మ ఇండ్ల డబ్బులు రూ.70వేలు రాలేదని హాజీపూర్ మండలం కర్ణమామిడి గ్రామస్తులు ఆవేదన వ్యక్తం చేశారు. ఇండ్ల పైసలు త్వరగా ఇప్పించాలని కోరుతూ సోమవారం కలెక్టరేట్లో నిర్వహించిన గ్రీవెన్స్లో కలెక్టర్ బదావత్ సంతోష్కు విన్నవించారు. హాజీపూర్ మండలం పడనపల్లి గ్రామ శివారులో ఉన్న కడెం కెనాల్ను కొంతమంది కబ్జా చేసి పంటలు వేసుకోవడంతో తమ పొలాలకు సాగునీళ్లు రావడం లేదని, విచారణ జరిపించి న్యాయం చేయాలని కోరుతూ గ్రామానికి చెందిన కే.స్వామి దరఖాస్తు అందజేశాడు.
రాపల్లి గ్రామానికి చెందిన ఏనుగు భూపతిరెడ్డి ఎల్లంపల్లి ముంపు బాధితులకు జీవో నంబర్ 1, 2017 ప్రకారం తన కుమారుడికి మేజర్ సన్ డబ్బులు ఇప్పించాలని కోరాడు. మందమర్రి మండలం పులిమడుగుకు చెందిన ఆర్.సుశీల తమ తాతకు తిమ్మాపూర్ శివారులో ఉన్న భూమిని తన చిన్నాన తప్పుడు ఆధారాలతో పట్టా చేసుకున్నారని, ఆ పట్టాను రద్దు చేస్తూ చట్టప్రకారం భూమిని పంచాలని వేడుకుంది. బెల్లంపల్లి మండలం రంగపేట శివారులో ఉన్న తన భూమిని గతంలో రైతుబంధు వచ్చి నిలిచిపోయిందని, తిరిగి ఇప్పించాలని కరీంనగర్ జిల్లా వీణవంక మండలం బేతిగల్కు చెందిన గొట్టెముక్కుల వీరవెంకటరామారావు కోరాడు.
భీమిని మండలం అక్కలపల్లి శివారులో తమ తాతల నుంచి వారసత్వంగా వచ్చిన భూమిని కొందరు దౌర్జన్యంగా ఆక్రమించుకొని బెదిరిస్తున్నారని, న్యాయం జరిపించాలని కామెర రాంచందర్ విన్నవించుకున్నాడు. నెన్నెల మండలం మన్నెగూడకు చెందిన గొల్లపల్లి శంకర్కు సేత్వార్ ప్రకారం భూమి పట్టా ఉన్నప్పటికీ ధరణిలో బ్లాక్ చేయడం వల్ల రిజిస్ట్రేషన్ చేసుకోలేకపోతున్నామని, అన్ బ్లాక్ చేయాలని కోరాడు. కన్నెపల్లి మండలం దాంపూర్ శివారులోని తన భూమి ధరణిలో తన పేరు తప్పుగా నమోదు అయిందని, సవరించాలని కోరుతూ భీమిని మండలం అక్కలపల్లికి చెందిన ఇప్ప గంగయ్య పిటీషన్ అందజేశాడు.
