- పదవుల కోసం పంతం పడుతున్న లీడర్లు
- ఏకాభిప్రాయం కోసం ముఖ్య నేతల కసరత్తు
- పదవులు దక్కించుకోడానికి ఆశావాహుల పైరవీలు
- కాంగ్రెస్ పెద్దల చెంతకు పంచాయితీ
నిజామాబాద్, వెలుగు: జిల్లాలో నామినేటెడ్ పోస్టుల కోసం నేతల మధ్య పోటీ నెలకొంది. అగ్రికల్చర్ మార్కెట్ కమిటీ చైర్మన్ పదవులతో పాటు ఇతర పోస్టుల భర్తీ అంశం కొలిక్కి వచ్చినట్లు కనబడినా, కొన్ని చోట్ల సీనియర్ లీడర్లు పదవుల కోసం పట్టుబడుతుండడంలో ఏకాభిప్రాయం సాధ్యం కావడంలేదు. బోధన్, కోటగిరి మార్కెట్ పోస్టులు వారం కింద భర్తీచేయగా, మిగితావాటి కోసం భారీ కసరత్తు చేస్తున్నారు.
ఇందూర్ మార్కెట్ కోసం పట్టు
వరంగల్, ఖమ్మం తర్వాత నిజామాబాద్ మార్కెట్ కమిటీ స్టేట్లో మూడవ స్థానంలో ఉంది. ఏటా రూ.2,300 కోట్ల టర్నోవర్గల ఈ కమిటీ చైర్మన్ పోస్టుకు డిప్యూటీ మంత్రి హోదా ఉండటం విశేషం. 2019 తరువాత ఖాళీగా ఉన్న చైర్మన్ పదవి కోసం సీనియర్ నేతలు పట్టుబట్టారు. జిల్లా కిసాన్ సెల్ ప్రెసిడెంట్ ముప్ప గంగారెడ్డి పేరు దాదాపు ఫైనల్ అయినట్టు చెప్తున్నా ఈ పదవి కోసం శేఖర్గౌడ్ , మరో నేత యాదగిరి పట్టుబడుతున్నారు. మార్కెట్ రేసు నుంచి తప్పుకోడానికి నగేష్రెడ్డి స్టేట్ పోస్టు కోరుతున్నారు.
మొన్నటి అసెంబ్లీ ఎలక్షన్లో ఆయన రూరల్ టికెట్ ఆశించారు. నిజామాబాద్ మార్కెట్ కమిటీ పదవుల పంచాయతీ ఇప్పుడు టీపీసీసీ ప్రెసిడెంట్ మహేష్కుమార్ గౌడ్, రూరల్ ఎమ్మెల్యే డాక్టర్ భూపతిరెడ్డి చెంతకు చేరింది. వారు ఎవరిని ఫైనల్ చేస్తారనే అంశం ఉత్కంఠ రేపుతోంది. వీరిలో ఒకరికి మార్కెట్ కమిటీ అప్పగించి మిగితా ఇద్దరిలో ఒకరికి జిల్లా గ్రంథాలయం, సాయిబాబా మందిరం బాధ్యతలు అప్పగించే ప్రతిపాదన తెరమీదకు తెచ్చారు.
నుడా పోస్టు అంతే
నిజామాబాద్ అర్బన్ డెవలప్మెంట్ అథారిటీ (నుడా) విషయంలోనూ నాలుగు రోజుల కింద అనూహ్య పరిణామాలు చోటు చేసుకున్నాయి. మాజీ మంత్రి డి.శ్రీనివాస్ తనయుడు, మాజీ మేయర్ డి.సంజయ్ఈ పదవిని ఆశిస్తున్నారు. అసెంబ్లీ ఎన్నికల్లో అర్బన్ టికెట్ ఆశించి భంగపడ్డ ఆయన ప్రాధాన్యతగల నుడా పోస్టు కోసం పట్టుబడుతుండగా నగరానికి చెందిన సింగిల్ విండో మాజీ చైర్మన్ అంతిరెడ్డి రాజిరెడ్డి, పార్టీలో సీనియర్ నాయకుడు నరాల రత్నాకర్ రేసులో ఉన్నారు. అసెంబ్లీ ఎలక్షన్లో పోటీ చాన్స్ దక్కని నగర పార్టీ ప్రెసిడెంట్ కేశవేణు ఇప్పుడు పోటీలోకి వచ్చారు.
నుడా ఇవ్వని పక్షంలో రాష్ట్రస్థాయి పదవి ఇవ్వాలని నేతలకు కోరారు. 2004 నుంచి 2014 దాకా స్టేట్లో కాంగ్రెస్ పవర్లో ఉన్నప్పుడు ఎలాంటి పదవి దక్కని టీపీసీసీ జనరల్ సెక్రటరీ గడుగు గంగాధర్ దళిత సామాజిక వర్గం కింద స్టేట్ పోస్టుపై ఆశలు పెట్టుకున్నారు. పార్టీ ప్రెసిడెంట్గా మహేష్గౌడ్ బాధ్యతలు స్వీకరించాక, ప్రభుత్వ సలహాదారుడు షబ్బీర్అలీ, ఎమ్మెల్యేలు సుదర్శన్రెడ్డి, భూపతిరెడ్డి సమావేశమై ఎవరికి ఏ పదవి ఇవ్వాలన్నది నిర్ణయించనున్నారు.
ఆర్మూర్, వర్నితో పాటు..
ఆర్మూర్ మార్కెట్ కమిటీ చైర్మన్ పదవి టౌన్ కాంగ్రెస్ ప్రెసిడెంట్ సాయిబాబాగౌడ్కు లోకల్ ముఖ్యలీడర్లంతా మద్దతిచ్చారు. చివరి నిమిషంలో మండల పార్టీ ప్రెసిడెంట్ విఠం జీవన్ పేరు తెరమీదకు రావడంతో పెండింగ్ లో పెట్టారు. వీరిద్దరి మధ్య రాజీ ప్రయత్నాలు జరుగుతున్నాయి. వేల్పూర్ మార్కెట్ కమిటీ కోసం పోటీపడుతున్న జలాల్పూర్ మోహన్రెడ్డి, రెంజర్ల ముత్యంరెడ్డి, కమ్మర్పల్లి అగ్రికల్చర్ మార్కెట్ కమిటీ పదవి కోసం పట్టుబడుతున్న పాలెం నర్సయ్య, గోర్త రాజేందర్ మధ్య సయోధ్యకు ముఖ్య నేతలు కృషి చేస్తున్నారు.
వర్ని మార్కెట్ పోస్టును సురేష్బాబా, నేమాని బుజ్జి, కూనీపూర్ రాజిరెడ్డి, యలమంచిలి శ్రీనివాస్, ప్రతాప్సింగ్ రాథోడ్ ఆశిస్తున్నారు. సుదీర్ఘ కాలం కాంగ్రెస్ను అంటిపెట్టుకున్న తమను గుర్తించాలని వీరిలో కొందరు టీపీసీసీ ప్రెసిడెంట్ మహేష్గౌడ్, జిల్లా ఇన్చార్జ్ మంత్రి జూపల్లి కృష్ణారావును కోరారు.
