కామారెడ్డి, వెలుగు: కామారెడ్డి మున్సిపల్ చైర్‌‌పర్సన్‌పై పెట్టిన అవిశ్వాస పరీక్షలో కాంగ్రెస్ నెగ్గగా.. చైర్పర్సన్ పదవి రేసు రసవత్తరంగా మారింది. ప్రస్తుత చైర్పర్సన్ పదవి కోసం కాంగ్రెస్‌లోని ఇద్దరు కౌన్సిలర్ల మధ్య తీవ్ర పోటీ నెలకొంది. ఈ ఇద్దరు కౌన్సిలర్లు కాంగ్రెస్ పెద్దల ఆశీర్వాదం తమకే ఉందని ప్రకటించుకుంటున్నారు. అయితే 2020లో జరిగిన మున్సిపల్ ఎన్నికల్లో 49 స్థానాలకు గాను బీఆర్ఎస్ 23, కాంగ్రెస్12, బీజేపీ 8, ఇండిపెండెంట్లు ఆరుగురు గెలిచారు. మెజార్టీ స్థానాలు గెలుచుకోవడం, రాష్ట్రంలో అప్పుడు బీఆర్ఎస్ అధికారంలో ఉండటంతో ఇండిపెండెంట్ కౌన్సిలర్లు కూడా ఆ పార్టీలో చేరారు. దీంతో చైర్‌‌పర్సన్‌గా నిట్టు జాహ్నవి, వైస్ చైర్ పర్సన్‌గా గడ్డం ఇందుప్రియ ఎన్నికయ్యారు. ఎమ్మెల్సీ ఎన్నికల టైంలో మరో ఎనిమిది మంది కాంగ్రెస్ కౌన్సిలర్లు బీఆర్‌‌ఎస్‌లో చేరారు.
మద్దతు కూడగట్టే ప్రయత్నాల్లో ..
బీఆర్ఎస్ చైర్పర్సన్ నిట్టు జాహ్నవిపై అవిశ్వాసం నెగ్గిన నేపథ్యంలో కాంగ్రెస్ పార్టీకి చెందిన కౌన్సిలర్లు చైర్పర్సన్ పదవి కోసం పోటీ పడుతున్నారు. అవిశ్వాసం పెట్టేందుకు మొదటి నుంచి తీవ్రంగా ప్రయత్నించిన వైస్ చైర్పర్సన్ గడ్డం ఇందుప్రియ, కౌన్సిలర్ ఉరుదొండ వనిత చైర్ పర్సన్ పదవి తమకే దక్కాలని ప్రయత్నాలు చేస్తున్నారు. అవిశ్వాసం బలపరీక్షకు ముందు గోవా క్యాంపులో ఉన్నప్పుడు వీరిద్దరూ చైర్పర్సన్ పదవి కోసం కౌన్సిలర్ల మద్దతు కూడగట్టే ప్రయత్నం చేశారు.
ఈ విషయం పార్టీ ముఖ్య నేతలకు తెలియడంతో హైదరాబాద్వచ్చిన తర్వాత కాంగ్రెస్ కౌన్సిలర్లతో ప్రభుత్వ సలహాదారు షబ్బీర్అలీ సమావేశమయ్యారు. ముందు అవిశ్వాస పరీక్షలో నెగ్గిన తర్వాత చైర్పర్సన్ పదవి గురించి ఆలోచిద్దామని ఆయన వారికి సూచించారు. ఆ తర్వాత సీఎం రేవంత్రెడ్డిని కౌన్సిలర్లు కలిశారు. చైర్పర్సన్ పదవి కోసం ఇద్దరు కౌన్సిలర్లు తీవ్రంగా ప్రయత్నిస్తున్న తరుణంలో ముఖ్య నేతలు నచ్చజెప్పి ఒకరికి చైర్పర్సన్, మరొకరికి వైస్చైర్పర్సన్ పదవి కట్టబెట్టే అవకాశాలు ఉన్నాయని జోరుగా ప్రచారం జరుగుతోంది.
కాంగ్రెస్ అధికారంలోకి రాగానే..
ఇటీవల అసెంబ్లీ ఎన్నికల్లో స్టేట్లో కాంగ్రెస్ పార్టీ అధికారంలోకి రావటంతో కామారెడ్డి మున్సిపాలిటీలో రాజకీయ సమీకరణాలు మారాయి. అసెంబ్లీ ఎన్నికల టైంలో వైస్ చైర్పర్సన్ గడ్డం ఇందుప్రియ, కౌన్సిలర్లు ముగ్గురు కాంగ్రెస్లో చేరారు. ఫలితాల తర్వాత క్రమంగా బీఆర్ఎస్ నుంచి కౌన్సిలర్ల చేరిక మరింత పెరిగింది. దీంతో కాంగ్రెస్ కౌన్సిలర్ల బలం మొత్తం 27కు చేరింది. మెజార్టీ సంఖ్య ఉండటంతో బీఆర్ఎస్ కు చెందిన చైర్‌‌పర్సన్‌పై అవిశ్వాసం పెట్టి విజయం సాధించారు.
