కోల్బెల్ట్,వెలుగు : గృహలక్ష్మి పథకం దరఖాస్తుల గడువు పెంచాలని మందమర్రి లోని చెన్నూరు ఎమ్మెల్యే బాల్క సుమన్ క్యాంపు ఆఫీస్ ఎదుట కాంగ్రెస్ నాయకులు బుధవారం ఆందోళన చేశారు. వారిని బీఆర్ఎస్ కార్యకర్తలు అడ్డుకొనేందుకు ప్రయత్నించడంతో, ఇరు వర్గాల మధ్య గొడవ జరిగింది. క్యాంపు ఆఫీస్లో ఉన్న బీఆర్ఎస్ లీడర్లు వినతిపత్రం తీసుకోవడానికి నిరాకరించారు. బీఆర్ఎస్ టౌన్ ప్రెసిడెంట్ జె.రవిందర్ తమ పార్టీకి చెందిన మహిళ లీడర్లను అవహేళన చేస్తూ దురుసుగా ప్రవర్తించడని ఆరోపిస్తూ... మహిళలకు క్షమాపణ చెప్పాలని కాంగ్రెస్ లీడర్లు డిమాండ్ చేశారు. అనంతరం కోల్బెల్ట్ రోడ్డులో రాస్తారోకో చేపట్టారు.
పోలీసులు అక్కడకు చేరుకున్నారు. పీసీసీ మెంబర్ నూకల రమేశ్, టౌన్ ప్రెసిడెంట్ నోముల ఉపేందర్ గౌడ్, సోషల్ మీడియ స్టేట్ జనరల్ సెక్రటరీ ఎండీ. ముజాహిద్, ఎస్సీ విభాగం ప్రెసిడెంట్ నర్వేట్ల శ్రీనివాస్, డీసీసీ మెంబర్ పుల్లూరి లక్ష్మన్, మహిళ విభాగం ప్రెసిడెంట్ గడ్డం రజినీని ఆదుపులోకి తీసుకొని పోలీస్స్టేషన్ తరలించారు. వీరిపై న్యూసెన్స్ కింద కేసు నమోదు చేసినట్లు ఎస్సై చంద్రకుమార్ తెలిపారు. కాగా గొడవ విషయంపై కాంగ్రెస్, బీఆర్ఎస్ లీడర్లు పరస్పరం పోలీసులకు ఫిర్యాదులు చేశారు.
