- ఫ్లెక్సీలో ఫొటో పెట్టకపోవడంపై ప్రశ్నించిన బాధితుడు
- దూషించడంతో సూసైడ్ అటెంప్ట్
- పెట్రోల్ పోసుకుని నిప్పు అంటించుకోవడంతో గాయాలు
మిర్యాలగూడ, వెలుగు: నల్గొండ జిల్లా మిర్యాలగూడలోని ఆరో వార్డులో ఆదివారం నిర్వహిస్తున్న ముత్యాలమ్మ పండగ సందర్భంగా ఏర్పాటు చేసిన కాంగ్రెస్ ఫ్లెక్సీలో తన ఫొటో, పేరు లేదని ఆ పార్టీ కార్యకర్త ఒంటిపై పెట్రోల్ పోసుకొని నిప్పంటించుకున్నాడు. స్థానికులు, బాధిత కుటుంబసభ్యులు, సెల్ఫీ వీడియోతో బాధితుడు వెల్లడించిన వివరాల ప్రకారం..ఇందిరమ్మ కాలనీ లే అవుట్–2 లో తేజావత్ భగవాన్ ఆరేండ్లుగా ఉంటున్నారు. కాంగ్రెస్ పార్టీలో క్రియాశీలక కార్యకర్తగా పని చేస్తున్నప్పటికీ ఇటీవల బీఆర్ఎస్ నుంచి కాంగ్రెస్లో చేరిన వారికే ప్రాధాన్యత ఇస్తున్నారనేది భగవాన్ ప్రధాన ఆరోపణ.
ముత్యాలమ్మ పండుగ వేళ కాలనీలోని గుడి దగ్గర తన ఫొటోను ఫ్లెక్సీలో ఎందుకు పెట్టలేదని శనివారం రాత్రి అదే కాలనీకి చెందిన కాంగ్రెస్ కార్యకర్తలను ప్రశ్నించగా వారు నోటికి వచ్చినట్టు తిట్టారు. ‘నువ్వో పెద్ద లీడర్వా.. నీ ఫొటో ఫ్లెక్సీలో పెట్టం...ఎవరికి చెప్పుకుంటావో చెప్పుకో’ అని అనడంతో మనస్తాపానికి గురయ్యాడు. ముత్యాలమ్మ గుడి సమీపంలోనే ఒంటిపై పెట్రోల్ పోసుకొని నిప్పంటించుకుని ఆత్మహత్యకు యత్నించాడు. భగవాన్ తీవ్రంగా గాయపడగా స్థానికులు అతడిని మిర్యాలగూడ ప్రభుత్వ ఏరియా దవాఖానకు, అక్కడి నుంచి హైదరాబాద్కు తరలించారు. తాను ఆత్మహత్యాయత్నం చేసేందుకు కారణమైన కొమర్రాజు నాగరాజు, రేబెల్లి సైదులు, మునుకుంట్ల కృష్ణతో పాటు మరో ఇద్దరిపై పోలీసులు చర్యలు తీసుకోవాలని బాధితుడు వీడియోలో కోరాడు.
