- వాళ్లు రేవంత్కు వ్యూహకర్తలుగా పనిచేస్తున్నరు: కేటీఆర్
హైదరాబాద్, వెలుగు: రాష్ట్రంలోని బీజేపీ నేతలు కాంగ్రెస్ నేతలతో కలిసి పనిచేస్తున్నారని బీఆర్ఎస్వర్కింగ్ ప్రెసిడెంట్ కేటీఆర్ ఆరోపించారు. బీజేపీ ఎంపీలతో ప్రధాని నరేంద్ర మోదీ భేటీపై ఆయన స్పందిస్తూ గురువారం ట్వీట్ చేశారు. ‘‘సీఎం రేవంత్ రెడ్డికి వ్యూహకర్తలుగా రాష్ట్ర బీజేపీ నేతలు పనిచేస్తున్నారు. రాష్ట్రంలో ఎన్ని అరాచకాలు జరిగినా బీజేపీ నుంచి ఒక్కరూ నోరుమెదపరు. రేవంత్మీద ఈగవాలకుండా కాపాడుకుంటారు. హైడ్రా మంచిదంటారు. మూసీ కావాలంటారు. ఏమైనా అంటే నిద్ర అంటూ నటిస్తారు. పిల్లలు చనిపోయినా.. రైతు గుండె పగిలినా.. గిరిజనులను చెరబట్టినా చప్పట్లు కొడతారు. రాష్ట్రంలో కాంగ్రెస్చేతిలోనే కమలం జాగ్రత్తగా, భద్రంగా ఉంది’’ అని కేటీఆర్ తన ట్వీట్లో పేర్కొన్నారు.
దేనికి రైతు పండగలు..?
రైతు పండుగలు దేనికి చేస్తున్నారో చెప్పాలని సర్కారును కేటీఆర్ ప్రశ్నించారు. రైతు భరోసాకు ఎగనామం పెట్టి రుణమాఫీ పేరుతో పంగనామాలు పెట్టారని విమర్శించారు. దిలావర్పూర్, రామన్నపేటల్లో దమనకాండను సృష్టించి.. లగచర్ల రైతులను జైలుకు పంపి అల్లుడి కళ్లలో ఆనందం చూసినందుకు రైతు పండుగలు చేస్తున్నారా అని ప్రశ్నించారు. పండుగలు కాంగ్రెస్ నేతలకు.. పస్తులు రైతులకా అన్నారు. రైతును నిండా ముంచి వ్యవసాయాన్ని ఆగం చేసినందుకు విజయోత్సవాలు చేస్తున్నారా అని నిలదీశారు. స్టూడెంట్లకు పురుగుల అన్నం పెట్టడమేంటని ప్రశ్నిస్తే బీఆర్ఎస్వీ నేతలపై కేసులు పెట్టి రాత్రంతా జాడ చెప్పకుండా ఎక్కడెక్కడో తిప్పారని కేటీఆర్ పేర్కొన్నారు.
