- వనపర్తిలో కాంగ్రెస్ అభ్యర్థి మేఘా రెడ్డి చేతిలో నిరంజన్రెడ్డి పరాజయం
వనపర్తి, వెలుగు : ఓడలు బండ్లు.. బండ్లు ఓడలు అవుడంటే ఇదే! మొన్నటిదాకా ఓ మామూలు ఎంపీపీగా ఉన్న వ్యక్తి, ఏకంగా మంత్రిని ఓడించడం సంచలనంగా మారింది. వనపర్తి అసెంబ్లీ నియోజకవర్గం నుంచి కాంగ్రెస్ అభ్యర్థిగా బరిలో నిలిచిన పెద్దమందడి మండల పరిషత్ అధ్యక్షుడు బీఆర్ఎస్ అభ్యర్థి మేఘారెడ్డి, రాష్ట్ర వ్యవసాయ శాఖ మంత్రి సింగిరెడ్డి నిరంజన్ రెడ్డిని చిత్తుగా ఓడించారు.
బీఆర్ఎస్లో ఉన్న మేఘారెడ్డి మంత్రితో విభేదించి ఎన్నికలకు కొద్ది రోజుల ముందు కాంగ్రెస్లో చేరాడు. ఆ పార్టీ టికెట్ కోసం సీనియర్ నేత, మాజీ మంత్రి చిన్నారెడ్డితో మేఘారెడ్డి పోటీపడ్డారు. మొదట చిన్నారెడ్డికి టికెట్ కేటాయించిన కాంగ్రెస్ హైకమాండ్, తర్వాత మనసు మార్చుకుంది. ఇంటర్నల్ సర్వేలో చిన్నారెడ్డికి వ్యతిరేకంగా రిపోర్టు రావడంతో
వనపర్తి టికెట్ను మేఘారెడ్డికి కేటాయించింది. కొద్దికాలంలోనే కాంగ్రెస్ శ్రేణులను, అభిమానులను కూడగట్టుకున్న మేఘారెడ్డి కొండలాంటి మంత్రి నిరంజన్రెడ్డిని ఢీకొట్టి ఏకంగా 25 వేల మెజారిటీతో విజయం సాధించారు. బీఆర్ఎస్ లోని గ్రూపులు, మంత్రిపై వచ్చిన అవినీతి ఆరోపణలు కూడా నిరంజ్రెడ్డికి మైనస్ అయ్యాయి. కాంగ్రెస్ అభ్యర్థి మేఘా రెడ్డి1,05,469 ఓట్లు రాబట్టగా మంత్రి నిరంజన్ రెడ్డి 81,269 ఓట్లకు పరిమితమయ్యారు. ఇక్కడ బీజేపీ అభ్యర్థి అనుజ్ఞ రెడ్డి 9,032 ఓట్లు సాధించారు.
